ന്യൂഡല്ഹി: ഉത്തര്പ്രദേശിലെ ലഖിംപുര് ഖേരിയില് എട്ടു കര്ഷകര് കൊല്ലപ്പെട്ട സംഭവത്തില് സുപ്രീം കോടതി സ്വമേധയാ കേസെടുത്തു. സുപ്രീം കോടതി ചീഫ് ജസ്റ്റിസ് എന്.വി രമണ അധ്യക്ഷനായ ബെഞ്ച് കേസ് ഇന്ന് പരിഗണിക്കും. ജസ്റ്റിസുമാരായ സൂര്യകാന്ത്, ഹിമ കോഹ്ലി എന്നിവരാണ് ബെഞ്ചിലെ മറ്റംഗങ്ങള്. ഉത്തര്പ്രദേശ് സര്ക്കാരിന്റെയും കേന്ദ്ര സര്ക്കാരിന്റെയും വാദം കോടതി പരിഗണിക്കും.
ആരോപണ വിധേയന് കേന്ദ്ര ആഭ്യന്തര സഹമന്ത്രിയുടെ മകനായതിനാല് കേസ് ഉത്തര്പ്രദേശ് പോലീസ് അന്വേഷിച്ചാല് സത്യം പുറത്തുവരില്ലെന്ന് ചൂണ്ടിക്കാട്ടി ഉത്തര്പ്രദേശില് നിന്നുള്ള രണ്ട് അഭിഭാഷകര് സുപ്രീം കോടതി ചീഫ് ജസ്റ്റിസിന് കത്തയച്ചിരുന്നു. കോടതി മേല്നോട്ടത്തിലുള്ള സി.ബി.ഐ അന്വേഷണമാണ് ഇക്കാര്യത്തില് ആവശ്യമെന്നും ഇവര് വ്യക്തമാക്കിയിരുന്നു. ഈ കത്തിന്റെ കൂടെ അടിസ്ഥാനത്തിലാണ് കോടതിയുടെ നടപടി.
സംഘര്ഷത്തില് ഇന്നലെ പുറത്തുവന്ന എഫ്ഐആറില് കേന്ദ്രമന്ത്രി അജയ് മിശ്രയുടെ മകന് ആശിശ് മിശ്രയ്ക്കെതിരെ കൊലപാതകുറ്റം ചുമത്തിയിരുന്നു. ആശിശ് മിശ്ര സ്ഥലത്തുണ്ടായിരുന്ന ഒരു വിഡിയോയും പുറത്തു വന്നു.