കൊച്ചി: സീറോ മലബാര് സഭയിലെ എല്ലാ മെത്രാന്മാരും സിനഡ് തീരുമാന പ്രകാരമുള്ള ഏകീകൃത കുര്ബാന അര്പ്പിക്കണമെന്ന നിര്ദ്ദേശവുമായി കര്ദ്ദിനാള് മാര് ജോര്ജ് ആലഞ്ചേരിയുടെ സര്ക്കുലര്. എറണാകുളം അങ്കമാലി അതിരൂപതയിലെത്തുന്ന മെത്രാന്മാര്ക്ക് അതിനുവേണ്ട സൗകര്യമൊരുക്കണമെന്ന് അതിരൂപത മെത്രാപ്പൊലീത്തന് വികാരി മാര് ആന്റണി കരിയിലിന് നിര്ദ്ദേശം നല്കി.
നിലവില് ഏകീകൃത കുര്ബാന അര്പ്പിക്കുന്നതില് നിന്നും എറണാകുളം അങ്കമാലി അതിരൂപതയിലെ പുരോഹിതര്ക്ക് മാത്രമേ ഇളവുള്ളൂ. ഈ ഇളവ് മൂലം മറ്റിടങ്ങളിലെ മെത്രാന്മാരും പുരോഹിതരും എറണാകുളം അങ്കമാലി അതിരൂപതിയിലെത്തിയാല് ഏകീകൃത കുര്ബാന അര്പ്പിക്കാനാവില്ല. ഈ സാഹചര്യത്തിലാണ് സഭാധ്യക്ഷന് മാര് ജോര്ജ് ആലഞ്ചേരിയുടെ പുതിയ സര്ക്കുലര്.
സഭയിലെ എല്ലാ മെത്രാന്മാരും എവിടെ പോയാലും ഏകീകൃത കുര്ബാന മാത്രമേ അര്പ്പിക്കാവൂ എന്ന് സര്ക്കുലറിലൂടെ കര്ശന നിര്ദ്ദേശം നല്കി. അടുത്ത ഈസ്റ്ററോടെ ഏകീകൃത കൂര്ബാന സഭയിലാകമാനം നടപ്പിലാക്കുമെന്ന് മാര് ജോര്ജ് ആലഞ്ചേരി പറഞ്ഞു.