ന്യൂഡല്ഹി: കുടകള്, ഇറക്കുമതി ചെയ്യുന്ന നിര്മ്മാണ വസ്തുക്കള്, ഇമിറ്റേഷന് ആഭരണങ്ങള് എന്നിവയുടെ വില വര്ധിക്കുമെന്ന് ബജറ്റ് അവതരണ വേളയില് ധനമന്ത്രി നിര്മ്മല സീതാരാമന് വ്യക്തമാക്കി.
മൊബൈല് ഫോണ്, വജ്രം, രത്നങ്ങള്, എന്നിവയുടെ വില കുറയും. മുറിച്ചതും തിളക്കം കൂട്ടിയതുമായ ഡയമണ്ടുകളുടെയും രത്നങ്ങളുടെയും കസ്റ്റംസ് നികുതി അഞ്ചു ശതമാനമായി കുറയ്ക്കാനാണ് ബജറ്റില് നിര്ദേശിച്ചിരിക്കുന്നത്.
ഒക്ടോബര് മാസം മുതല് പെട്രോളിയം ഉല്പന്നങ്ങള്ക്ക് രണ്ടു രൂപ അധിക എക്സൈസ് തീരുവയായി ചുമത്താന് ബജറ്റില് നിര്ദേശമുള്ളതിനാല് ഇന്ധന വില ഉയരാനിടയുണ്ട്. ബ്ലെന്ഡ് ചെയ്യാത്ത പെട്രോളിനും ഡീസലിനുമാണ് പുതിയ തീരുമാനം ബാധകമാകുക.
പരിസ്ഥിത സൗഹൃദമാക്കുന്നതിന്റെ ഭാഗമായി പലയിടത്തും എഥനോള് ചേര്ത്ത ഇന്ധനം വില്ക്കുന്നുണ്ട്. ഇത് കൂടുതല് സാര്വ്വത്രികമാക്കുന്നതിന്റെ ഭാഗമായാണ് ബ്ലെന്ഡ് ചെയ്യാത്ത പെട്രോളിയം ഉല്പന്നങ്ങള്ക്ക് അധിക നികുതി ചുമത്താന് നിര്ദേശിച്ചത്.
ബ്ലെന്ഡ് ചെയ്യാത്ത ഇന്ധനം ഇറക്കുമതി ചെലവ് വര്ധിക്കാന് കാരണമാകുന്നതായി ബജറ്റ് വിലയിരുത്തുന്നു. ഇതിന് പുറമേ കര്ഷകരുടെ വരുമാനം വര്ധിപ്പിക്കാന് ലക്ഷ്യമിട്ടു കൂടിയാണ് ബ്ലെന്ഡ് ചെയ്യാത്ത പെട്രോളിയം ഉല്പന്നങ്ങള്ക്ക് നികുതി ഏര്പ്പെടുത്താന് ബജറ്റ് നിര്ദേശിക്കുന്നതെന്നാണ് ധനമന്ത്രിയുടെ വാദഗതി.