ന്യൂഡല്ഹി: ലതാ മങ്കേഷ്കറുടെ മരണത്തില് രാജ്യത്ത് രണ്ടു ദിവസത്തെ ദുഖാചരണം. ഗായികയോടുള്ള ആദരസൂചകമായി രണ്ടുദിവസം ദേശീയ പതാക പകുതി താഴ്ത്തും. വാര്ത്താ ഏജന്സിയായ എ.എന്.ഐ.യാണ് ഇക്കാര്യം റിപ്പോര്ട്ട് ചെയ്തത്. കോവിഡ് സാഹചര്യത്തില് സംസ്കാരം ഇന്നു വൈകിട്ട് ആറിന് നടക്കും. മുംബൈയിലെ ശിവജി പാര്ക്കിലാണ് അന്ത്യവിശ്രമം ഒരുക്കുക.
ലതാ മങ്കേഷ്കറുടെ മരണത്തില് പ്രധാനമന്ത്രി നരേന്ദ്രമോഡി, രാഷ്ട്രപതി രാംനാഥ് കോവിന്ദ് തുടങ്ങിയവര് അനുശോചനം രേഖപ്പെടുത്തി. വാക്കുകള്ക്ക് അതീതമായ മനോവേദനയിലാണ് താനെന്നും ലതാ ദീദി നമ്മളെ വിട്ടു പിരിഞ്ഞെന്നും പ്രധാനമന്ത്രി ട്വിറ്ററില് കുറിച്ചു. ലതാ മങ്കേഷ്ക്കറിന്റെ വിയോഗം ഒരിക്കലും നികത്താന് കഴിയാത്ത വിടവാണ്.
ഇന്ത്യന് സംസ്കാരത്തിന്റെ അതികായകയെന്ന നിലയില് വരും തലമുറകള് അവരെ ഓര്ക്കും. ലതാ ദീദിയുടെ മരണത്തില് ഇന്ത്യക്കാര്ക്കൊപ്പം ഞാനും ദുഖം രേഖപ്പെടുത്തുന്നുവെന്നും മോഡി ട്വീറ്റ് ചെയ്തു.
ലതാ മങ്കേഷ്കറിന്റെ വിയോഗം ഹൃദയഭേദകമാണെന്ന് രാഷ്ട്രപതി രാംനാഥ് കോവിന്ദ് ട്വിറ്ററില് പറഞ്ഞു. അവരുടെ നേട്ടങ്ങള് സമാനതകളില്ലാതെ നിലനില്ക്കുമെന്നും അദ്ദേഹം ട്വിറ്ററില് കുറിച്ചു.