തിരുവനന്തപുരം: സമൂഹ്യ മാധ്യമങ്ങളിലൂടെ പ്രകോപനപരമായ സന്ദേശങ്ങള് പ്രചരിപ്പിച്ചാല് കര്ശന നടപടിയെന്ന് പൊലീസ്. പാലക്കാട്ടെ രണ്ട് കൊലപാതകങ്ങളുടെ പശ്ചാത്തലത്തിലാണ് പൊലീസ് അറിയിപ്പ്.
പ്രകോപനപരമായ സന്ദേശങ്ങള് പ്രചരിപ്പിക്കുന്നവരും ഗ്രൂപ്പുകളും ഗ്രൂപ്പ് അഡ്മിന്മാരും പൊലീസിന്റെ നിരീക്ഷണത്തിലാണ്. ഇത്തരക്കാര്ക്ക് എതിരെ ശക്തമായ നടപടികള് സ്വീകരിക്കുമെന്നും പൊലീസ് അറിയിച്ചു.
പാലക്കാട് നടന്ന അനിഷ്ടസംഭവങ്ങളെത്തുടര്ന്ന് സമൂഹമാധ്യമങ്ങളിലൂടെ മതസ്പര്ദ്ധ വളര്ത്തുന്ന തരത്തില് പ്രചാരണം നടത്തുന്നവര്ക്കെതിരെ നിയമ നടപടി സ്വീകരിക്കുമെന്ന് സംസ്ഥാന പോലീസ് മേധാവി അനില്കാന്ത് അറിയിച്ചു. സാമൂഹ്യ മാധ്യമങ്ങളിലൂടെ വ്യാജപ്രചാരണം നടത്തുകയോ അക്രമ സംഭവങ്ങള്ക്ക് ആഹ്വാനം ചെയ്യുകയോ ചെയ്യുന്നവര്ക്ക് എതിരെ നിയമനടപടി സ്വീകരിക്കും.
എല്ലാത്തരം സാമൂഹ്യ മാധ്യമങ്ങളിലും 24 മണിക്കൂറും സൈബര് പട്രോളിംഗ് നടത്താന് സൈബര്ഡോം, ഹൈടെക് ക്രൈം എന്ക്വയറി സെല്, സൈബര് പോലീസ് സ്റ്റേഷന് എന്നിവയ്ക്ക് നിര്ദ്ദേശം നല്കിയിട്ടുണ്ടെന്നും അദ്ദേഹം പറഞ്ഞു. അതേസമയം പാലക്കാട്ടെ കൊലപാതകങ്ങള് പ്രത്യേക സംഘങ്ങള് അന്വേഷിക്കുമെന്ന് അനില് കാന്ത്
വ്യക്തമാക്കി.
ഉത്തര മേഖല ഐജി ക്യാമ്പ് ചെയ്ത് അന്വേഷണ പുരോഗതിക്ക് നേതൃത്വം നല്കും. അക്രമ സംഭവങ്ങള് തുടരാതിരിക്കാന് എല്ലാ വിധ നടപടികളും സ്വീകരിക്കുമെന്നും കരുതല് അറസ്റ്റ് ഉള്പ്പെടെയുണ്ടാകുമെന്നും ഡിജിപി അറിയിച്ചു.