പാലക്കാട്: പാലക്കാട്ടെ രണ്ടു കൊലപാതകങ്ങളും ആസൂത്രിതമെന്ന് വ്യക്തമാക്കി എ.ഡി.ജി.പി വിജയ് സാഖറെ. രണ്ടു കേസുകളിലെ പ്രതികളെക്കുറിച്ചുള്ള വ്യക്തമായ സൂചനകള് ലഭിച്ചിട്ടുണ്ടെന്നും അദ്ദേഹം മാധ്യമങ്ങളോട് പറഞ്ഞു.
എസ്.ഡി.പി.ഐ പ്രവര്ത്തകന് സുബൈര് വധക്കേസിലെ പ്രതികളെക്കുറിച്ച് വ്യക്തമായ സൂചനകള് ലഭിച്ചിട്ടുണ്ട്. ഒരു തരത്തിലുമുള്ള വിട്ടുവീഴ്ചകളും ഇല്ലാതെ അന്വേഷണം പൂര്ത്തിയാക്കുമെന്നും അദ്ദേഹം പറഞ്ഞു. വളരെ വേഗത്തില് രണ്ട് കേസിലുമുള്ള പ്രതികളെ പിടികൂടാന് കഴിയുമെന്നും അദ്ദേഹം പറഞ്ഞു. കേസില് അഞ്ച് സംഘങ്ങളായാണ് അന്വേഷണം നടത്തുന്നതെന്നും അദ്ദേഹം കൂട്ടിച്ചേര്ത്തു.
ശ്രീനിവാസന് വധക്കേസില് സി.സി.ടി.വി ദൃശ്യങ്ങള് അടിസ്ഥാനമാക്കിയാണ് അന്വേഷണം പുരോഗമിക്കുന്നത്. പ്രതികളെന്ന് സംശയിക്കപ്പെടുന്നവരുടെ സൂചനകള് ലഭിച്ചിട്ടുണ്ട്. ഇവരെ പിടികൂടാന് നാല് സംഘങ്ങളെ രൂപീകരിച്ചിട്ടുണ്ട്. എത്രയും പെട്ടെന്ന് തന്നെ ഇവരേയും പിടികൂടും. രണ്ട് കേസുകളുമായി ബന്ധപ്പെട്ട് നിരവധി പേരെ ചോദ്യം ചെയ്തുവരികയാണ്. ഇതിന് ശേഷം മാത്രമേ കൂടുതല് വിവരങ്ങള് പറയാന് സാധിക്കൂ എന്ന് വിജയ് സാഖറെ അറിയിച്ചു.