കാലിഫോര്‍ണിയ: അതിമാരക പ്രഹരശേഷി ആര്‍ജിക്കുന്നതിനായി മാരക മയക്കുമരുന്നുകളില്‍ കലര്‍ത്തുന്ന 42,000 ഗ്രാം നിരോധിത ഫെന്റനില്‍ മയക്കുമരുന്ന് ഗുളികകള്‍ പോലീസ് കണ്ടെടുത്തു. കാലിഫോര്‍ണിയയിലെ ഒക്ലാന്‍ഡിലും ഹേവാര്‍ഡിലും നടത്തിയ റെയ്ഡിലാണ് 92.5 പൗണ്ട് ഭാരം (ഏകദേശം 42 കിലോ) വരുന്ന അനധികൃത ഫെന്റനില്‍ പിടിച്ചെടുത്തത്.
നാര്‍ക്കോട്ടിക്‌സ് ടാസ്‌ക് ഫോഴ്‌സിലെ എസിഎസ്ഒ ഡിറ്റക്ടീവുകളും അവരുടെ പങ്കാളികളും ചേര്‍ന്നാണ്‌ റെയ്ഡ് നടത്തിയത്. ഫെന്റനില്‍ ബേ ഏരിയയിലെ തെരുവുകളിലെ മയക്കുമരുന്ന് വില്‍പ്പന സംഘത്തിന് കൈമാറാന്‍ എത്തിച്ചതായിരുന്നു ഇതെന്ന് അലമേഡ കൗണ്ടി ഷെരീഫ് ഓഫീസ് ട്വിറ്ററിലൂടെ അറിയിച്ചു.
ഡ്രഗ് എന്‍ഫോഴ്‌സ്‌മെന്റ് അഡ്മിനിസ്‌ട്രേഷന്റെ അഭിപ്രായ പ്രകാരം പിടിച്ചെടുത്ത അനധികൃത ഫെന്റനിലിന്റെ അളവ് 20 ദശലക്ഷത്തിലധികം ആളുകളെ ജീവിന്‍ അപകടത്തിലാക്കാന്‍ കഴിയുംവിധം മാരകമാണെന്ന് പറയുന്നു. ഹെറോയിന്‍, മെത്താംഫെറ്റമിന്‍, കൊക്കെയ്ന്‍ എന്നിവയുള്‍പ്പെടെയുള്ള മരുന്നുകളുമായി ഇത് കൂടികലര്‍ത്തുമ്പോള്‍ മാരക ശേഷി ഇരട്ടിയാകും.