കാസര്ഗോഡ്: ഷിഗെല്ല വ്യാപന ആശങ്കയില് കാസര്ഗോഡ് ജില്ലയില് ആരോഗ്യ വകുപ്പ് ജാഗ്രതാ നടപടികള് ശക്തമാക്കി. ചെറുവത്തൂരിലെ ഐഡിയല് ഫുഡ് പോയന്റില് നിന്ന് ഷവര്മ്മ കഴിച്ചവര്ക്ക് ഭക്ഷ്യ വിഷബാധ ഉണ്ടാക്കാന് കാരണം ഷിഗെല്ല ബാക്ടീരിയ ആണെന്ന് ഇന്നലെയാണ് സ്ഥിരീകരിച്ചത്. ഇതോടെ ഇവരില് നിന്ന് മറ്റുള്ളവരിലേക്ക് രോഗം പടരാതിരിക്കാനുള്ള മുന്കരുതലിലാണ് അധികൃതര്.
കാസര്കോട്, കണ്ണൂര് ജില്ലകളിലെ വിവിധ ആശുപത്രികളിലായി ചികിത്സയിലുള്ളവര് പ്രത്യേകം നിരീക്ഷണത്തിലാണ്. നിരീക്ഷണം ശക്തമാക്കാന് പ്രത്യേക മെഡിക്കല് സംഘത്തെ രൂപീകരിക്കാനും ആലോചിക്കുന്നുണ്ട്.
പനി, രക്തംകലര്ന്ന മലവിസര്ജ്ജനം, നിര്ജ്ജലീകരണം, ക്ഷീണം എന്നിവ ഉണ്ടായാല് ഉടന് വൈദ്യസഹായം തേടണമെന്ന് കാസര്കോട് ജില്ലാ മെഡിക്കല് ഓഫീസര് ഡോ. എവി രാംദാസ് അഭ്യര്ത്ഥിച്ചു.
ഭക്ഷ്യ വിഷബാധയുമായി ബന്ധപ്പെട്ട് മൂന്ന് പേരാണ് ഇതുവരെ അറസ്റ്റിലായത്. ചെറുവത്തൂര് ഐഡിയല് ഫുഡ് പോയന്റ് മാനേജര് പടന്ന സ്വദേശി അഹമ്മദ്, മാനേജിംഗ് പാര്ട്ണര് മംഗളൂര് കൊല്യ സ്വദേശി അനക്സ് ഗാര്, ഷവര്മ മേക്കര് നേപ്പാള് സ്വദേശി സന്ദേശ് റായ് എന്നിവരാണ് അറസ്റ്റിലായത്.