മലപ്പുറം: ഗുഡ്സ് ഓട്ടോയില് സ്ഫോടനം നടത്തി മലപ്പുറത്ത് കൂട്ടക്കൊല. ഭര്ത്താവായ മുഹമ്മദ് ആണ് ഭാര്യയേയും കുട്ടിയേയും കൊലപ്പെടുത്തിയത്. ഒരു കുട്ടിക്ക് ഗുരുതരമായി പരിക്കേറ്റു.
പെരിന്തല്മണ്ണയ്ക്ക് സമീപം കൊണ്ടിപറമ്പില് ഇന്നു രാവിലെയാണ് സംഭവം. പലയന്തോള് സ്വദേശി മുഹമ്മദ് (51), ഭാര്യ ജാസ്മിന് (37), മകള് ഫാത്തിമ സഫ (11) എന്നിവരാണ് മരിച്ചത്. അഞ്ച് വയസുള്ള മറ്റൊരു മകള് സഫാനയെ ഗുരുതരാവസ്ഥയില് കോഴിക്കോട് മെഡിക്കല് കോളജ് ആശുപത്രിയില് പ്രവേശിപ്പിച്ചു.
കുടുംബപ്രശ്നത്തെ തുടര്ന്ന് ജാസ്മിന് കുറച്ചുനാളായി സ്വന്തം വീട്ടിലാണ് കുട്ടികളുമായി കഴിഞ്ഞിരുന്നത്. രാവിലെ കുട്ടികളെ കാണണമെന്നും വീട്ടിലേക്ക് മടങ്ങാമെന്നും പറഞ്ഞെത്തിയ മുഹമ്മദ് ഭാര്യയേയും കുട്ടികളെയും ഓട്ടോയ്ക്കുള്ളിലാക്കി പൂട്ടി. തുടര്ന്ന് സ്ഫോടനം നടത്തുകയായിരുന്നു. രണ്ട് തവണ സ്ഫോടന ശബ്ദം കേട്ടുവെന്നാണ് നാട്ടുകാര് പറയുന്നത്.
നാട്ടുകാര് വെള്ളമൊഴിച്ച് തീയണയ്ക്കാന് ശ്രമിച്ചുവെങ്കിലും അടുത്തേക്ക് എത്താന് കഴിഞ്ഞില്ല. ഫയര്ഫോഴ്സുകാര് എത്തി വെള്ളം ഒഴിച്ച് തീ കെടുത്തുകയായിരുന്നു. ഇതിനകം വാഹനത്തിലുണ്ടായിരുന്നവര് കത്തിയമര്ന്നിരുന്നു.
നേരത്തെ കാസര്ഗോഡ് ഒരു പോക്സോ കേസില് പ്രതിയാണ് മുഹമ്മദ്. ആദ്യ ഭാര്യയെ സ്ത്രീധനത്തിന്റെ പേരില് ഉപദ്രവിച്ചതിനും മുഹമ്മദിനെതിരെ കേസുണ്ട്. പത്ത് വര്ഷമായി കാസര്ഗോഡാണ് കുടുംബം താമസിക്കുന്നത്. മീന് കച്ചവടമാണ് മുഹമ്മദിന്റെ ജോലി.