തിരുവനന്തപുരം: ബഫര് സോണ് വിഷയത്തില് പരാതികള് സമര്പ്പിക്കാനുള്ള സമയ പരിധി അവസാനിച്ചപ്പോള് ഇതുവരെ ലഭിച്ചത് 63,500 പരാതികള്. ഇതില് 24,528 പരാതികള് പരിഹരിച്ചു. 28,493 എണ്ണം കേരള സംസ്ഥാന റിമോട്ട് സെന്സിങ് എന്വയോണ്മെന്റ് സെന്ററിന്റെ (കെഎസ്ആര്ഇസി) അസറ്റ് മാപ്പറില് അപ്ലോഡ് ചെയ്തു. പുതിയ പരാതികള് ഇനി സ്വീകരിക്കില്ലെന്നും വനം വകുപ്പ് അറിയിച്ചു.
ഏറ്റവും കൂടുതല് പരാതികള് ലഭിച്ചത് പീച്ചി വൈല്ഡ് ലൈഫിന് കീഴിലാണ്. കേരള സ്റ്റേറ്റ് റിമോര്ട്ട് സെന്സിങ് ആന്റ് എന്വയോണ്മെന്റ് സെന്ററിന്റെ അസറ്റ് മാപ്പര് ഉപയോഗിച്ച് ഇതുവരെ പുതുതായി കണ്ടെത്തിയ നിര്മിതികളില് അപ്ലോഡ് ചെയ്തിരിക്കുന്നത് 18496 എണ്ണമാണ്. സെര്വര് തകരാറു മൂലം കണ്ടെത്തിയ നിര്മിതികളില് പലതും ചേര്ക്കാനായിട്ടില്ല. ഇന്നലെ ഉച്ചയോടെ തകരാര് പരിഹരിച്ചിട്ടുണ്ട്.
പരിസ്ഥിതിലോല മേഖല വനം വകുപ്പു പുറത്തു വിട്ട ഭൂപടങ്ങളിന്മേല് ഇതു വരെ ലഭിച്ച പരാതികളിന്മേല് നേരിട്ടുള്ള സ്ഥലപരിശോധനയും, അസറ്റ് മാപ്പര് മാപ്പിലൂടെ വിവരങ്ങള് അപ്ഡലോഡ് ചെയ്യുന്നതും ഒരാഴ്ച കൂടി തുടരും. പരിസ്ഥിതി ലോല മേഖലയിലെ ജനവാസ കേന്ദ്രങ്ങളില് വനം റവന്യു തദ്ദേശ വകുപ്പുകള് നടത്തുന്ന പരിശോധന പല സ്ഥലങ്ങളിലും പൂര്ത്തിയായില്ല. പരിശോധനയ്ക്കായി കൂടുതല് സമയം അനുവദിക്കണമെന്ന് തദ്ദേശ സ്ഥാപനങ്ങള് ആവശ്യപ്പെട്ടിരുന്നു.
അതേസമയം, ബഫര്സോണില് വീണ്ടും സംസ്ഥാന സര്ക്കാറിനെ കുറ്റപ്പെടുത്തി പ്രതിപക്ഷം രംഗത്തെത്തി. പ്രതിസന്ധിയുടെ പൂര്ണ ഉത്തരവാദിത്തം സംസ്ഥാന സര്ക്കാറിനാണെന്നായിരുന്നു പ്രതിപക്ഷ വിമര്ശനം. എന്നാല്, പ്രതിപക്ഷം കലക്കവെള്ളത്തില് മീന് പിടിക്കുകയാണെന്ന് വനംമന്ത്രി എ.കെ.ശശീന്ദ്രന് പറഞ്ഞു.