തിരുവനന്തപുരം: എസ്എസ്എല്സി, ഹയര് സെക്കന്ഡറി, വൊക്കേഷനല് ഹയര് സെക്കന്ഡറി രണ്ടാം വര്ഷ പരീക്ഷകളും മാര്ച്ച് 17 മുതല് 30 വരെ നടത്താന് തീരുമാനിച്ചു. മുഖ്യമന്ത്രി പിണറായി വിജയന്റെ അധ്യക്ഷതയില് ചേര്ന്ന ഉന്നതതലയോഗത്തിലാണ് തീരുമാനം.
പ്രാക്ടിക്കല് പരീക്ഷക്ക് തയ്യാറെടുക്കുന്നവർക്കുള്ള ക്ലാസുകള് ജനുവരി ഒന്നു മുതല് ആരംഭിക്കും. ജൂണ് ഒന്നു മുതല് ആരംഭിച്ച ഓണ്ലൈന് ക്ലാസുകളുടെ റിവിഷൻ ജനുവരി ഒന്നു മുതല് സ്കൂള്തലത്തില് നടത്തുന്നതിന് ക്രമീകരണവും ഉണ്ടാകും.
മാതൃകാപരീക്ഷകളും കൗണ്സലിങ്ങും സ്കൂള്തലത്തില് നടത്തും. ഇതിനു വേണ്ടി 10, 12 ക്ലാസുകളിലെ വിദ്യാര്ത്ഥികള്ക്ക് രക്ഷകര്ത്താക്കളുടെ സമ്മതത്തോടെ സ്കൂളില് പോകാം. നിലവിലുള്ള അധ്യാപകരുടെ സേവനം പ്രയോജനപ്പെടുത്തിക്കൊണ്ട് ഇക്കാര്യങ്ങള് നടത്തും.