കൊച്ചി: ദേശിയ പാതകളിലെ ടോള് പ്ലാസകളില് ഇന്നു മുതല് ഫാസ്ടാഗ് നിര്ബന്ധമാക്കി. ഇനിമുതല് ഫാസ്ടാഗ് ഇല്ലാത്ത വാഹനങ്ങള് ഇരട്ടിത്തുക ടോള് നല്കേണ്ടതായി വരും. കേന്ദ്ര മോട്ടോര് വാഹന നിയമം ഭേദഗതി ചെയ്താണ് കേന്ദ്ര ഗതാഗത മന്ത്രാലയം ഫാസ്ടാഗ് നിര്ബന്ധമാക്കിയത്.
2021 ജനുവരി ഒന്നു മുതല് ടോള് പ്ലാസകളില് ഫാസ്ടാഗ് നിര്ബന്ധമാക്കുമെന്നായിരുന്നു കേന്ദ്രത്തിന്റെ നേരത്തെയുള്ള ഉത്തരവ്. എന്നാൽ പിന്നീടത് ഫെബ്രുവരി 15- ലേക്ക് നീട്ടുകയായിരുന്നു. വാഹനങ്ങളില് ഫാസ്ടാഗ് ഇന്സ്റ്റാള് ചെയ്തിട്ടില്ലെങ്കിലും പ്രവര്ത്തിക്കാത്ത ഫാസ്ടാഗാണെങ്കിലും പിഴ നല്കേണ്ടി വരും.
ദേശീയ പാതകളിലെ എല്ലാ ട്രാക്കുകളിലും ഫാസ്ടാഗ് സംവിധാനമുണ്ടെന്ന് കേന്ദ്ര സര്ക്കാര് വ്യക്തമാക്കി. ഡിജിറ്റല് പേയ്മെന്റ് പ്രോത്സാഹിപ്പിക്കുന്നതിനും കാത്തിരിപ്പ് സമയവും ഇന്ധന ഉപഭോഗം കുറയ്ക്കുന്നതിനും ടോള് പ്ലാസകളിലൂടെ തടസമില്ലാതെ കടന്നു പോകുന്നതിനും ഫാസ്ടാഗിലേക്കുള്ള മാറ്റം സഹായിക്കുമെന്നാണ് കരുതുന്നത്.