കൊച്ചി: ബലാത്സംഗ കേസില് ഒളിവില് കഴിയുന്ന പാലക്കാട് എംഎല്എ രാഹുല് മാങ്കൂട്ടത്തിലിന്റെ അറസ്റ്റ് തടഞ്ഞ് ഹൈക്കോടതി. ഈ മാസം 15 വരെ അറസ്റ്റ് പാടില്ലെന്ന് ഹൈക്കോടതി വ്യക്തമാക്കി. 15 ന് മുന്കൂര് ജാമ്യാപേക്ഷ വീണ്ടും പരിഗണിക്കും.
തിരഞ്ഞെടുപ്പിന് ശേഷമായിരിക്കും കേസ് ഇനി പരിഗണിക്കുക. കേസില് വിശദമായ വാദം കേള്ക്കണമെന്ന് കോടതി വ്യക്തമാക്കി. കേസ് ഡയറി ഹാജരാക്കാനും നിര്ദേശം നല്കിയിട്ടുണ്ട്. ഇന്നലെയാണ് മുന്കൂര് ജാമ്യാപേക്ഷയുമായി രാഹുല് മാങ്കൂട്ടത്തില് ഹൈക്കോടതിയെ സമീപിച്ചത്.
അതേസമയം പത്താം ദിവസവും രാഹുല് ഒളിവില് തുടരുകയാണ്. ജസ്റ്റിസ് കെ. ബാബുവിന്റെ ബെഞ്ചാണ് ഹര്ജി പരിഗണിച്ചത്. തല്ക്കാലത്തേക്ക് അറസ്റ്റ് തടഞ്ഞുകൊണ്ടുള്ള ഇടക്കാല ഉത്തരവാണ് ഇപ്പോള് പുറത്ത് വന്നിരിക്കുന്നത്. ഹര്ജിയില് വാദം കേട്ടിട്ടില്ല. വിശദമായ വാദം കേട്ടതിന് ശേഷമേ ഇക്കാര്യത്തില് ഒരു തീരുമാനത്തില് എത്താവൂ എന്ന് രാഹുല് മാങ്കൂട്ടത്തിലിന്റെ അഭിഭാഷകന് വാദം ഉന്നയിച്ചു. തുടര്ന്ന് ഇടക്കാല ഉത്തരവ് പുറപ്പെടുവിക്കുന്നതായും രാഹുല് മാങ്കൂട്ടത്തിലിന്റെ അറസ്റ്റ് തല്ക്കാലത്തേക്ക് തടയുന്നതായും ജസ്റ്റിസ് കെ ബാബു അറിയിക്കുകയായിരുന്നു.