തിരുവന്തപുരം: സംസ്ഥാനത്ത് വാരാന്ത്യ ലോക് ഡൗണ് വേണ്ടെന്ന് ചീഫ് സെക്രട്ടറിയുടെ അധ്യക്ഷതയില് ചേര്ന്ന യോഗത്തില് തീരുമാനം. കോവിഡ് വ്യാപനത്തിന്റെ പശ്ചാത്തലത്തില് പരിശോധനകള് വര്ധിപ്പിക്കാനും യോഗത്തില് തീരുമാനമായി. രോഗവ്യാപനം കൂടിയ സ്ഥലങ്ങളില് എല്ലാവരേയും പരിശോധിക്കും. ടെസ്റ്റ് പോസിറ്റിവിറ്റി നിരക്ക് മൂന്ന് ശതമാനമാക്കി കുറയ്ക്കും. ടെസ്റ്റ് പോസിറ്റിവിറ്റി നിരക്ക് ഉയര്ന്ന പഞ്ചായത്തുകളിലെ എല്ലാ വീടുകളും പരിശോധന നടത്താനും യോഗത്തില് തീരുമാനമായി.
കോവിഡിന്റെ രണ്ടാംവരവിനെ നേരിടാന് സംസ്ഥാനം സജ്ജമാണെന്ന് മന്ത്രി കെകെ ശൈലജ അറിയിച്ചു. ആശുപത്രി സൗകര്യങ്ങള് ഒരുക്കുന്നതിലും, കുറ്റമറ്റ രീതിയില് വാക്സിന് നല്കുന്നതിലും, ഐസിയുകളുടെ എണ്ണം കൂട്ടുന്നതിലും, മെഡിക്കല് ഓക്സിജന്റെ ലഭ്യത ഉറപ്പ് വരുത്തുന്നതിനുമൊക്കെ വേണ്ട നടപടികള് സ്വീകരിച്ചു വരുന്നു. പരിശോധന വേഗത്തിലാക്കി മരണങ്ങള് പരമാവധി കുറച്ച് ആശുപത്രി സൗകര്യങ്ങള് എല്ലാവര്ക്കും ലഭ്യമാക്കി ജനജീവിതം സാധാരണ നിലയില് ആക്കുവാനാണ് ശ്രമിക്കുന്നതെന്നും മന്ത്രി കൂട്ടിച്ചേര്ത്തു.