തിരുവനന്തപുരം: കോവിഡ് വ്യാപനം രൂക്ഷമായ പശ്ചാത്തലത്തില് സംസ്ഥാന സര്ക്കാര് കേരളത്തില് കൂടുതല് നിയന്ത്രണങ്ങള് ഏര്പ്പെടുത്തി. മുഖ്യമന്ത്രിയുടെ അധ്യക്ഷതയില് ചേര്ന്ന യോഗത്തിലാണ് ശക്തമായ നടപടികള് സ്വീകരിക്കാന് തീരുമാനിച്ചത്.
ശനി, ഞായര് ദിവസങ്ങളില് അവശ്യ സര്വീസുകള് ഒഴികെയുള്ളവയ്ക്ക് കര്ശന നിയന്ത്രണം ഏര്പ്പെടുത്താന് യോഗത്തില് നിര്ദേശമുണ്ടായി. സര്ക്കാര് ഓഫിസുകളില് ദിവസവും പകുതി ജീവനക്കാര് എത്തിയാല് മതി. ശനിയാഴ്ചകളില് സര്ക്കാര് ഓഫീസുകള്ക്ക് അവധി നല്കാനും തീരുമാനിച്ചിട്ടുണ്ട്. സ്വകാര്യ മേഖലയിലും വര്ക്ക് ഫ്രം ഹോം പ്രോത്സാഹിപ്പിക്കും.
ബീച്ചുകളിലും പാര്ക്കുകളിലും കര്ശന നിയന്ത്രണം ഏര്പ്പെടുത്തും. വിദ്യാഭ്യാസ സ്ഥാപനങ്ങളില് ഓണ്ലൈന് ക്ലാസുകള് മാത്രമേ അനുവദിക്കൂ. വാക്സിന് വിതരണത്തില് തിക്കും തിരക്കും ഒഴിവാക്കുന്നതിനുള്ള നടപടി സ്വീകരിക്കും. പരമാവധി പേര്ക്ക് ഓണ്ലൈന് വഴി രജിസ്ട്രേഷന് നടത്താനും പ്രത്യേക സമയം അനുവദിച്ച് വാക്സിനേഷന് നടത്താനും തീരുമാനമായി. മുഖ്യമന്ത്രി വൈകിട്ട് ആറിന് നടത്തുന്ന പത്രസമ്മേളനത്തില് നിയന്ത്രണങ്ങളുടെ കൂടുതല് വിശദാംശങ്ങള് അറിയിക്കും.