ന്യൂഡല്ഹി: കോവിഡ് മഹാമാരിയിലും പ്രകൃതി ദുരന്തങ്ങളെയും ഒറ്റക്കെട്ടായി രാജ്യം നേരിട്ടുവെന്ന് പ്രധാനമന്ത്രി നരേന്ദ്ര മോഡി. ദുരന്തങ്ങളില് ജീവഹാനി പരമാവധി കുറയ്ക്കാനായെന്നും പ്രതിമാസ റേഡിയോ പരിപാടിയായ മന് കീ ബാത്തില് മോഡി പറഞ്ഞു.
രണ്ട് പ്രകൃതി ദുരന്തങ്ങളിലും ആശ്വാസ പ്രവര്ത്തനം നടത്തിയവരെ മോഡി അഭിവാദ്യം ചെയ്തു. നൂറ്റാണ്ടിലെ ഏറ്റവും വലിയ പ്രതിസന്ധിയാണ് കോവിഡ്. വെല്ലുവിളി എത്ര വലുതായാലും അതിനെ നേരിടാന് രാജ്യം തയ്യാറാണ്. സര്വശക്തിയും ഉപയോഗിച്ച് രാജ്യം കോവിഡിനെതിരേ പോരാടുമെന്നും പ്രധാനമന്ത്രി പറഞ്ഞു.
കടുത്ത പ്രതിസന്ധി നിറഞ്ഞ സാഹചര്യത്തില് ഓക്സിജന് എക്സ്പ്രസ് ഓടിച്ചവരും മറ്റു കോവിഡ് മുന്നണി പോരാളികളില് ചിലരേയും മന് കീ ബാത്തില് പ്രധാനമന്ത്രി നേരിട്ടുവിളിച്ച് അഭിനന്ദിച്ചു. രണ്ടാം മോഡി സര്ക്കാരിന്റെ രണ്ടാം വാര്ഷിക ദിനത്തില് നടന്ന മന് കീ ബാത്തില് ചുഴലിക്കാറ്റ്, കോവിഡ് പ്രവർത്തനങ്ങളെ മുൻനിർത്തിയാണ് പ്രധാനമന്ത്രി സംസാരിച്ചത്.