ന്യൂഡല്ഹി: ഇന്ത്യയുടെ പുതുതലമുറ അഗ്നി പ്രൈം മിസൈല് വിജയകരമായി പരീക്ഷിച്ചു. ഒഡീഷ തീരത്ത് ഇന്നലെ രാവിലെ 10.55ന് ആയിരുന്നു പരീക്ഷണമെന്നു പ്രതിരോധ ഗവേഷണ വികസന കേന്ദ്രം (ഡിആര്ഡിഒ) അറിയിച്ചു.
ഇന്ത്യയുടെ മിസൈല് ശേഷിയ്ക്ക് കരുത്ത് വര്ധിപ്പിക്കുന്ന നേട്ടമാണിത്. കരയില് നിന്നു കരയിലേക്കു തൊടുക്കാവുന്ന അഗ്നി പ്രൈമിന് ചൈനയുടെ വെല്ലുവിളി നേരിടാനാകും വിധം രണ്ടായിരം കിലോമീറ്റര് വരെ ദൂരപരിധിയുണ്ട്. അഗ്നി ഒന്നിന്റെ പരിഷ്കരിച്ച പതിപ്പാണിത്. ഭാരം കുറവായതിനാല് ദുര്ഘട മേഖലകളിലുള്പ്പെടെ അഗ്നി പ്രൈം മിസൈല് എളുപ്പം വിന്യസിക്കാനാകും. തുടര്പരീക്ഷണങ്ങളും വിജയമാകുന്ന മുറയ്ക്ക് സൈന്യത്തിന്റെ ഭാഗമാകും. ഒരാഴ്ചയ്ക്കിടെ ഡിആര്ഡിഒയുടെ രണ്ടാമത്തെ പരീക്ഷണ വിജയമാണിത്. പിനാക റോക്കറ്റിന്റെ പരിഷ്കരിച്ച പതിപ്പായിരുന്നു ആദ്യത്തേത്.