ന്യൂഡല്ഹി: കോവിഡ് സാഹചര്യം ചര്ച്ച ചെയ്യാന് പ്രധാനമന്ത്രി നരേന്ദ്ര മോഡി കേരളം അടക്കം കോവിഡ് വ്യാപനം കൂടിയ സംസ്ഥാനങ്ങളിലെ മുഖ്യമന്ത്രിമാരുടെ യോഗം വിളിച്ചു. ഈ മാസം 16ന് രാവിലെ 11ന് വീഡിയോ കോണ്ഫറന്സ് വഴിയാണ് യോഗം.
കേരളം, മഹാരാഷ്ട്ര, ഒഡീഷ, ആന്ധ്ര, തമിഴ്നാട് മുഖ്യമന്ത്രിമാര്ക്കാണ് ക്ഷണം. രാജ്യത്ത് കോവിഡ് വ്യാപനം ഇപ്പോഴും കൂടുതലായി തുടരുന്ന സംസ്ഥാനങ്ങളാണ് മഹാരാഷ്ട്രയും കേരളവും. കേരളത്തില് പ്രതിദിന കേവിഡ് കേസുകളുടെ എണ്ണം പതിനായിരത്തിന് മുകളിലാണ്. ടെസ്റ്റ് പോസിറ്റിവിറ്റി നിരക്ക് പത്തിന് മുകളിലാണ്.
മഹാരാഷ്ട്രയിലും രോഗ ബാധിതരുടെ എണ്ണത്തില് വര്ധനവുണ്ടാകുന്നുണ്ട്. ഇതു പരിഗണിച്ച് കോവിഡ് കേസുകള് കൂടുതലുള്ള സംസ്ഥാനങ്ങളിലേക്ക് കേന്ദ്ര സര്ക്കാര് സ്ഥിതിഗതികള് വിലയിരുത്താന് വിദഗ്ധ സംഘത്തെ അയച്ചിരുന്നു.
കോവിഡ് സാഹചര്യം വിലയിരുത്താന് പ്രധാനമന്ത്രി വടക്കുകിഴക്കന് സംസ്ഥാനങ്ങളിലെ മുഖ്യമന്ത്രിമാരുമായി ഇന്ന് ചര്ച്ച നടത്തിയിരുന്നു. കോവിഡ് പ്രതിരോധത്തില് വീഴ്ച വന്നാല് മൂന്നാം തരംഗമുണ്ടാകുമെന്നാണ് യോഗത്തില് അദ്ദേഹം നല്കിയ മുന്നറിയിപ്പ്.