ന്യുഡല്ഹി: രാജ്യത്ത് ഡ്രോണ് ഉപയോഗത്തിന് പുതിയ ചട്ടം പ്രഖ്യാപിച്ച് കേന്ദ്ര സര്ക്കാര്. ചട്ടത്തിന്റെ കരട് കേന്ദ്രസര്ക്കാര് പ്രസിദ്ധീകരിച്ചു. ഇത് കരട് നിയമം മാത്രമാണ്, അന്തിമ ചട്ടം പൊതുജനാഭിപ്രായം തേടിയ ശേഷമായിരിക്കും. അടുത്ത മാസം അഞ്ചുവരെ പൊതുജനങ്ങള്ക്ക് അഭിപ്രായം അറിയിക്കാം.
ജമ്മു കശ്മീരലടക്കം ഡ്രോണ് ഭീഷണി ആവര്ത്തിക്കുമ്പോഴാണ് ഡ്രോണ് ഉപയോഗത്തിനുള്ള പുതിയ കരട് ചട്ടം പുറത്തുവരുന്നത്. സ്വകാര്യ വാണിജ്യ ഉപയോഗം സംബന്ധിച്ച് പ്രതിപാദിക്കുന്ന കരടില് ഇവയുടെ ലൈസന്സ് , ഉപയോഗത്തിന് അനുമതിയുള്ള പ്രദേശങ്ങള്, വിദേശ കമ്പനികള് പാലിക്കേണ്ട നിയമങ്ങള് അടക്കം വ്യക്തമാക്കിയിട്ടുണ്ട്.
തീരെ ചെറിയ ഡ്രോണുകള്ക്കും, ഗവേഷണ ആവശ്യത്തിനുള്ള ഡ്രോണ് ഉപയോഗത്തിനും ലൈസന് ആവശ്യമില്ലെന്നതാണ് പ്രധാന മാറ്റങ്ങളില് ഒന്ന്. എന്നാല് രണ്ട് കിലോഗ്രാമിന് മുകളില് ഭാരമുള്ള ഡ്രോണുകള് പ്രവര്ത്തിപ്പിക്കാന് ലൈസന്സ് നിര്ബന്ധമാണ്. പതിനെട്ട് വയസ് തികഞ്ഞവര്ക്ക് മാത്രമേ ലൈസന്സ് നല്കുകയുള്ളൂ. പത്ത് വര്ഷമായിരിക്കും ലൈസന്സ് കാലാവധി.