കൊച്ചി: ട്രാന്സ്ജെന്ഡര് ആക്ടിവിസ്റ്റ് അനന്യ കുമാരി അലക്സിന്റെ മരണത്തില് സ്വമേധയാ അന്വേഷണം പ്രഖ്യാപിച്ച് ഇന്ത്യന് മെഡിക്കല് അസോസിയേഷന് (ഐ.എം.എ). ഒരു വര്ഷം മുന്പു നടന്ന ലിംഗമാറ്റ ശസ്ത്രക്രിയയിലെ അപാകതകളെ തുടര്ന്നാണ് അനന്യ ജീവനൊടുക്കിയതെന്ന ആരോപണത്തിന്മേലാണ് അന്വേഷണം. ഡോ. റോയി എബ്രഹാം കള്ളുവേലില് അധ്യക്ഷനായ നാലംഗ സമിതിയാണ് അന്വേഷണം നടത്തുക.
രണ്ട് സൈക്കാട്രിസ്റ്റുമാരും ഒരു സീനിയര് പ്ലാസ്റ്റിക് സര്ജനും അടങ്ങുന്നതാണ് സമിതി. ട്രാന്സ്ജെന്ഡര് സമൂഹത്തിന്റെ ആശങ്ക കണക്കിലെടുത്താണ് വിഷയത്തില് സ്വമേധയാ അന്വേഷണം നടത്താന് ഐ.എം.എ തീരുമാനം കൈക്കൊണ്ടതെന്ന് പ്രസിഡന്റ് ഡോ. പി.ടി. സക്കറിയ അറിയിച്ചു. ലിംഗമാറ്റ ശസ്ത്രക്രിയയില് ഡോക്ടര്ക്ക് പിഴവ് സംഭവിച്ചു എന്ന ആരോപണവുമായി അനന്യ നേരത്തേ രംഗത്തെത്തിയിരുന്നു. ഇതിനു പിന്നാലെയായിരുന്നു ആത്മഹത്യ.