തിരുവനന്തപുരം: സംസ്ഥാനത്ത് ഇന്ന് സമ്പൂർണ ലോക്ഡൗണ്. അവശ്യ സാധനങ്ങള് വില്ക്കുന്ന കടകള്ക്ക് രാവിലെ ഏഴ് മുതല് രാത്രി ഏഴ് വരെ തുറക്കാം. എന്നാൽ ശനി, ഞായര് ദിവസങ്ങളില് ഏര്പ്പെടുത്തിയിരുന്ന വാരാന്ത്യ ലോക്ഡൗണ് ഞായറാഴ്ച മാത്രമായി ചുരുക്കുകയായിരുന്നു. കെഎസ്ആര്ടിസി ബസുകള് സര്വീസ് നടത്തില്ല.
സ്വാതന്ത്രദിനമായ അടുത്ത ഞായറാഴ്ചയും ഓണത്തിനും വാര്യന്ത്യലോക്ഡൗണ് ഉണ്ടാവുകയില്ല. കോവിഡ് നിയന്ത്രണങ്ങളില് കൂടുതല് ഇളവുകള് പ്രഖ്യാപിച്ചുകൊണ്ട് ഷോപ്പിംഗ് മാളുകള് തുറക്കാന് സര്ക്കാര് അനുമതി നല്കി.
തിങ്കള് മുതല് ശനി വരെ രാവിലെ ഏഴുമുതല് വൈകിട്ട് ഒന്പതു മണിവരെ വരെ പ്രവര്ത്തിക്കാനാണ് അനുമതി. ബുധനാഴ്ച മുതലാണ് കര്ക്കശമായ കോവിഡ് മാനദണ്ഡങ്ങള് ഉറപ്പാക്കി മാളുകള് തുറക്കാന് അനുമതി നല്കുക.
നിലവിലെ ഉത്തരവ് പ്രകാരം സര്ക്കാര് ഓഫീസുകളില് ഹാജരാവാനുള്ള എല്ലാ ഉദ്യോഗസ്ഥരും ഹാജരാകുന്നുണ്ടോ എന്ന് മേലധികാരികള് ഉറപ്പാക്കണമെന്ന് മുഖ്യമന്ത്രി നിര്ദേശം നല്കി.