തിരുവനന്തപുരം: കേരളത്തിലെ ഡോക്ടര്മാര്ക്കെതിരെയുള്ള വ്യാപക ആക്രമണങ്ങളില് ശക്തമായ നടപടികള് ഉണ്ടാകുമെന്ന് മുഖ്യമന്ത്രി പിണറായി വിജയന്. ഡോക്ടര്മാര്ക്കെതിരെ നടന്ന അക്രമങ്ങളെക്കുറിച്ച് ചര്ച്ച ചെയ്യാന് ചേര്ന്ന ഉന്നതതല യോഗത്തിലാണ് മുഖ്യമന്ത്രി ഇക്കാര്യം വ്യക്തമാക്കിയത്.
ഡോക്ടര്മാര്ക്ക് ജോലി നിര്വ്വഹിക്കാന് എല്ലാ സൗകര്യവും ഒരുക്കും. കാഷ്വാലിറ്റികളിലും ഒപികളിലും സിസിടിവി സ്ഥാപിക്കണം. സ്വകാര്യ ആശുപത്രികളും അതിന് സംവിധാനമൊരുക്കണം. പോലീസ് എയ്ഡ് പോസ്റ്റ് ഉള്ള ആശുപത്രികളിലെ സിസിടിവി സംവിധാനം എയിഡ് പോസ്റ്റുമായി ബന്ധപ്പെടുത്തണം. അക്രമം നടന്നാല് എത്രയും പെട്ടെന്ന് പ്രതികളെ അറസ്റ്റു ചെയ്യണമെന്നും മുഖ്യമന്ത്രി പറഞ്ഞു.
ഒപികളിലും കാഷ്വാലിറ്റികളിലും സെക്യൂരിറ്റി ഉദ്യോഗസ്ഥരെ നിയമിക്കുമ്പോൾ ഇനി മുതല് വിമുക്തഭടന്മാരെ തെരഞ്ഞെടുക്കണമെന്നും അദ്ദേഹം നിര്ദേശിച്ചു. സ്വകാര്യ ആശുപത്രികളിലും ആവശ്യത്തിന് സെക്യൂരിറ്റി ജീവനക്കാരെ നിയമിക്കണം. മെഡിക്കല് കോളേജ് പോലുള്ള വലിയ ആശുപത്രികളില് സ്റ്റേറ്റ് ഇന്ഡസ്ട്രിയല് സെക്യൂരിറ്റി ഫോഴ്സിലെ ഉദ്യോഗസ്ഥരെ ചീഫ് സെക്യൂരിറ്റി ഓഫീസറായി നിയമിക്കണം. നിലവിലുള്ള ഏജന്സികളുടെ കാലാവധി തീരുന്ന മുറക്ക് ഇത് നടപ്പാക്കണം. സെക്യൂരിറ്റി ഉദ്യോഗസ്ഥര്ക്ക് ആവശ്യമായ പരിശീലനവും നല്കണമെന്നും മുഖ്യമന്ത്രി പിണറായി വിജയന് നിർദ്ദേശിച്ചു.