തിരുവനന്തപുരം: കേരളത്തിലെ കോണ്ഗ്രസ് പുനസംഘടനയുമായി ബന്ധപ്പെട്ട് സംസ്ഥാന നേതാക്കള് ഇന്ന് രാഹുല് ഗാന്ധിയെ കാണും. കെ.സുധാകരന്, വി.ഡി.സതീശന് അടക്കം ഉള്ളവരാണ് രാഹുല് ഗാന്ധിയുമായി ചര്ച്ച നടത്തുക.
ഡിസിസി അധ്യക്ഷനെ അടക്കം ഈ മാസം അവസാനം പ്രഖ്യാപിക്കാനാണ് ശ്രമം. ഇന്നലെ രാത്രി സംസ്ഥാനത്തെ നേതാക്കള് കെ.പി.സി.സി അധ്യക്ഷന് കെ.സുധാകരന്റെ വസതിയില് പുനസംഘടനയുമായി ബന്ധപ്പെട്ട വിഷയങ്ങള് ചര്ച്ച ചെയ്യാന് യോഗം ചേര്ന്നു. ഗ്രൂപ്പ് വീതം വെപ്പുണ്ടാകില്ലെന്ന് നേരത്തെ വ്യക്തമാക്കിയെങ്കിലും ഉമ്മന്ചാണ്ടിയും ചെന്നിത്തലയും പല ജില്ലകളിലും ശക്തമായ അവകാശവാദം ഉന്നയിക്കുകയാണ്. ഇതോടെ അന്തിമ തീരുമാനത്തിലെത്താന് കഴിയാതായതോടെയാണ് ഒന്നിലധികം പേരുമായി ഹൈക്കമാന്ഡിനെ കാണാന് കെപിസിസി അധ്യക്ഷന് തീരുമാനിച്ചത്.
സജീവ ഗ്രൂപ്പ് പ്രവര്ത്തകരെ തന്നെയാണ് ഡിസിസി പ്രസിഡന്റുമാരായി നേതാക്കള് നിര്ദ്ദേശിച്ചിരിക്കുന്നത്. കഴിഞ്ഞ തെരഞ്ഞെടുപ്പില് തോല്പ്പിക്കാന് ശ്രമിച്ചുവെന്ന് സ്ഥാനാര്ത്ഥികള് പരാതിപ്പെട്ടവരും സാധ്യതാ പട്ടികയിലുണ്ടെന്ന ആക്ഷേപവും ഉയര്ന്നിട്ടുണ്ട്. എംപിമാരോ എംഎല്എമാരോ ഡിസിസി പ്രസിഡന്റാമാരാക്കേണ്ടതില്ലെന്നത് മാത്രമാണ് എകകണ്ഠ തീരുമാനം.