കോഴിക്കോട്: എം.എസ്.എഫ് നേതാക്കള് സ്ത്രീവിരുദ്ധ പരാമര്ശം നടത്തിയതുമായി ബന്ധപ്പെട്ട വിഷയത്തില് പരാതി പറഞ്ഞ എം.എസ്.എഫ് വനിതാ വിഭാഗമായ ഹരിത സംസ്ഥാന കമ്മിറ്റിയുടെ പ്രവര്ത്തനം മരവിപ്പിച്ചു.
മുസ്ലീം ലീഗ് സംസ്ഥാന ജനറല് സെക്രട്ടറി പി.എം.എ സലാം ഇതു സംബന്ധിച്ച ഔദ്യോഗിക വാര്ത്താക്കുറിപ്പ് പുറത്തിറക്കി. പ്രശ്നം പരിഹാര ചര്ച്ചയില് ഹരിത നേതാക്കള് വിട്ടുവീഴ്ചയ്ക്ക് തയ്യറാവാതെ വന്നതോടെയാണ് കടുത്ത തീരുമാനം.
ഹരിത ഭാരവാഹികള് ആരോപണമുന്നയിച്ച എം.എസ്.എഫ് സംസ്ഥാന പ്രസിഡന്റ് പി.കെ നവാസ്, മലപ്പുറം ജില്ലാ പ്രസിഡന്റ് കബീര് മുതുപറമ്പ്, ജനറല് സെക്രട്ടറി വി.എ വഹാബ് എന്നിവരോട് രണ്ടാഴ്ചയ്ക്കകം വിശദീകരണം നല്കാനും ആവശ്യപ്പെട്ടിണ്ട്.
പരാതി പിന്വലിച്ചാല് നടപടിയെ കുറിച്ച് ആലോചിക്കാമെന്ന് ലീഗും നടപടിയെടുത്താല് പരാതി പിന്വലിക്കാമെന്ന നിലപാടില് ഹരിതയും ഉറച്ച് നിന്നതോടെയാണ് കമ്മിറ്റി മരവിപ്പിക്കാന് ലീഗില് ധാരണയായത്.
പ്രശ്ന പരിഹാരത്തിനിടെ വനിതാ കമ്മീഷനില് പരാതി നല്കിയത് അച്ചടക്ക ലംഘനമാണെന്ന് വ്യക്തമാക്കി ലീഗ് നേതൃത്വം നേരത്തേ നേരത്തെ രംഗത്തെത്തിയിരുന്നു. എം.എസ്.എഫ് സംസ്ഥാന പ്രസിഡന്റ് പി.കെ നവാസ്, മുസ്ലീം ലീഗ് മലപ്പുറം ജില്ലാ ജനറല് സെക്രട്ടറി വി.അബ്ദുള് വഹാബ് എന്നിവര്ക്കെതിരേ ഹരിതയിലെ പത്ത് പെണ്കുട്ടികളായിരുന്നു വനിതാ കമ്മീഷന് പരാതി നല്കിയത്.