തിരുവനന്തപുരം: സര്ക്കാര് ജീവനക്കാരുടെ ക്വാറന്റീന് സ്പെഷ്യല് കാഷ്വല് ലീവ് ഏഴു ദിവസമാക്കി സര്ക്കാര് ഉത്തരവിറക്കി. സര്ക്കാര്, അര്ദ്ധസര്ക്കാര്, പൊതുമേഖല, സ്വയം ഭരണ സ്ഥാപനങ്ങളിലെ ജീവനക്കാര്ക്ക് ഉത്തരവ് ബാധകമാണ്. കോവിഡ് പോസിറ്റീവ് ആയവരും പ്രാഥമിക സമ്പര്ക്ക പട്ടികയിലുള്ള ജീവനക്കാരും പൊതു അവധികള് ഉള്പ്പെടെ ഏഴു ദിവസം കഴിഞ്ഞ് ടെസ്റ്റ് ചെയ്ത് നെഗറ്റീവ് ആയാല് ഓഫീസില് ഹാജരാകണം. ആരോഗ്യവകുപ്പിന്റെയോ തദ്ദേശസ്വയംഭരണ വകുപ്പിന്റെയോ സാക്ഷ്യപത്രത്തിന്റെ അടിസ്ഥാനത്തിലാണ് പ്രത്യേക കാഷ്വല് ലീവ് അനുവദിക്കുന്നത്.
രോഗിയുമായി പ്രാഥമിക സമ്പര്ക്ക പട്ടികയില് വന്ന ജീവനക്കാരന് മൂന്നു മാസത്തിനിടയില് കോവിഡ് രോഗമുക്തനായ വ്യക്തിയാണെങ്കില് ക്വാറന്റീനില് പോകേണ്ടതില്ല. ഇവര് കോവിഡ് നിര്ദ്ദേശങ്ങള് പാലിച്ചും രോഗ ലക്ഷണങ്ങള്ക്ക് സ്വയം നിരീക്ഷണത്തില് ഏര്പ്പെട്ടും ഓഫീസില് ഹാജരാകുകയും രോഗ ലക്ഷണം കണ്ടാല് ഉടന് ചികിത്സ തേടുകയും വേണമെന്നും ഉത്തരവില് പറയുന്നു.
കോവിഡ് മൂര്ച്ഛിച്ച് ആശുപത്രിയില് ചികിത്സ തേടേണ്ടി വരുന്ന ജീവനക്കാര്ക്ക് ആശുപത്രി രേഖകളുടെ അടിസ്ഥാനത്തില് ചികിത്സ കാലയളവ് മുഴുവന് സ്പെഷ്യല് കാഷ്വല് ലീവ് അനുവദിക്കും. ഈ സംവിധാനം ദുരുപയോഗം ചെയ്യുന്ന ജീവനക്കാര്ക്കെതിരെ കര്ശന നടപടി സ്വീകരിക്കുമെന്നും ഉത്തരവില് വ്യക്തമാക്കുന്നു.