ന്യൂഡല്ഹി: കോവിഡ് വ്യാപന സാഹചര്യത്തില് അടച്ചുപൂട്ടിയ വിദ്യാലയങ്ങള് തുറക്കുന്നതിന് കേന്ദ്രത്തിനും സംസ്ഥാനങ്ങള്ക്കും നിര്ദ്ദേശം നല്കാനാകില്ലെന്ന് സുപ്രീം കോടതി. വിദ്യാലയങ്ങള് വീണ്ടും തുറക്കുന്നതില് തീരുമാനമെടുക്കേണ്ടത് സംസ്ഥാനങ്ങളാണെന്നും ഉചിതമായ തീരുമാനങ്ങള് സര്ക്കാരുകള് എടുക്കട്ടെയെന്നും കോടതി നിലപാടെടുത്തു.
കുട്ടികളുടെ കാര്യത്തില് തീരുമാനങ്ങളെടുക്കുമ്പോള് ജാഗ്രത വേണം. ഗുരുതര കോവിഡ് സാഹചര്യം നിലനില്ക്കുമ്പോള് സര്ക്കാരാണ് ഇക്കാര്യത്തില് ഉത്തരം പറയേണ്ടത്. സ്കൂളുകള് തുറക്കുമ്പോള് കൂടുതല് ശ്രദ്ധ പുലര്ത്തണമെന്ന് നിര്ദ്ദേശിച്ച കോടതി കേരളത്തിലെയും മഹാരാഷ്ട്രയിലെയും കോവിഡ് സാഹചര്യങ്ങള് കാണുന്നില്ലേയെന്നും ഹര്ജിക്കാരനോട് ചോദിച്ചു.
ജസ്റ്റിസ് ഡി.വൈ ചന്ദ്രചൂഢ് അധ്യക്ഷനായ ബെഞ്ചിന്റേതാണ് നിര്ദേശം. ഡല്ഹിയില് നിന്നുള്ള ഒരു വിദ്യാര്ത്ഥിയാണ് സ്കൂള് തുറക്കുന്നതില് നിര്ദ്ദേശം നല്കണമെന്നാവശ്യവുമായി കോടതിയെ സമീപിച്ചത്. കേരളത്തില് നവംബര് ഒന്നുമുതല് സ്കൂളുകള് തുറക്കുന്നതിന് സര്ക്കാര് തീരുമാനിച്ചിരുന്നു. ഒക്ടോബര് മാസം മുതല് ഡിഗ്രി തലത്തില് പഠനം തുടങ്ങാനും തീരുമാനമുണ്ടായിരുന്നു.