പാലക്കാട്: മലമ്പുഴ ഡാമിന്റെ വൃഷ്ടിപ്രദേശങ്ങളില് മഴ തുടരുന്ന സാഹചര്യത്തില് ബുധനാഴ്ച രാവിലെ ഒമ്പതിന് സ്പില്വേ ഷട്ടറുകള് തുറക്കുമെന്ന് എക്സിക്യൂട്ടീവ് എന്ജിനീയര് അറിയിച്ചു. ചൊവ്വാഴ്ച വൈകുന്നേരം ആറ് മണിക്കുള്ള ജലനിരപ്പ് 113.93 മീറ്ററാണ്.
ഇത് റൂള് കര്വ്വ് ലൈനിനേക്കാള് രണ്ട് സെന്റീമീറ്റര് കൂടുതലാണ്. മലമ്പുഴ ഡാമിന്റെ താഴ്ഭാഗത്തുള്ള മുക്കൈപ്പുഴ, കല്പ്പാത്തിപ്പുഴ, ഭാരതപ്പുഴ എന്നിവയുടെ തീരത്ത് താമസിക്കുന്നവരും മീന്പിടുത്തക്കാരും പുഴയില് ഇറങ്ങുന്നവരും ജാഗ്രത പാലിക്കണമെന്ന് എക്സിക്യൂട്ടീവ് എന്ജിനീയര് അറിയിച്ചു.
കേരളത്തില് അഞ്ച് ജില്ലകളില് അടുത്ത 24 മണിക്കൂര് നേരത്തേക്ക് തീവ്ര മഴയ്ക്ക് സാധ്യതയെന്ന് ഐഎംഡി മുതിര്ന്ന ശാസ്ത്രജ്ഞന് ആര്.കെ ജനമണി പറഞ്ഞു. ആലപ്പുഴ, കോട്ടയം, ഇടുക്കി, എറണാകുളം, പത്തനംതിട്ട ജില്ലകളിലാണ് മഴയ്ക്ക് സാധ്യത.