തിരുവനന്തപുരം: തലസ്ഥാനത്ത് അതിശക്തമായ മഴ തുടരുന്ന സാഹചര്യത്തിൽ ചൊവ്വാഴ്ച ജില്ലയിലെ പ്രൊഫഷണല് കോളജുകള് ഉള്പ്പെടെയുള്ള എല്ലാ വിദ്യാഭ്യാസ സ്ഥാപനങ്ങള്ക്കും ജില്ലാ കളക്ടര് ജെറോമിക് ജോര്ജ് അവധി പ്രഖ്യാപിച്ചു. കേന്ദ്രകാലാവസ്ഥാ നിരീക്ഷണ കേന്ദ്രവും സംസ്ഥാന ദുരന്ത നിവാരണ അതോറിറ്റിയും റെഡ് അലര്ട്ട് പ്രഖ്യാപിച്ച സാഹചര്യത്തിലുമാണ് അവധി. എന്നാൽ മുന്നിശ്ചയിച്ച പ്രകാരമുള്ള പൊതുപരീക്ഷകള്ക്ക് മാറ്റം ഉണ്ടായിരിക്കില്ല.
തൃശൂർ ജില്ലയില് അടുത്ത ദിവസങ്ങളിലായി ശക്തമായ മഴ പ്രവചനം വന്നിരിക്കുന്ന സാഹചര്യത്തില് പെരിങ്ങല്ക്കുത്ത് ഡാമിലെ ജലനിരപ്പ് ക്രമീകരിക്കുന്നതിന്റെ ഭാഗമായി ഡാമിന്റെ രണ്ട് ഷട്ടറുകള് കൂടി ഇന്ന് വൈകിട്ട് ആറ് മണിക്ക് മുമ്പ് തുറക്കും. രണ്ട് ഷട്ടറുകള് നേരത്തേ തുറന്നിരുന്നു. ചാലക്കുടിപ്പുഴയുടെ തീരത്ത് താമസിക്കുന്നവര് ജാഗ്രത പാലിക്കണമെന്ന് അധികൃതർ മുന്നറിയിപ്പ് നൽകിയിട്ടുണ്ട്.