തിരുവനന്തപുരം: മുതിര്ന്ന ആര്.എസ്.പി നേതാവ് പ്രൊഫ. ടി.ജെ ചന്ദ്രചൂഢന് അന്തരിച്ചു. 82 വയസായിരുന്നു. തിരുവനന്തപുരത്തെ സ്വകാര്യ ആശുപത്രിയില് വച്ചായിരുന്നു അന്ത്യം.
വാര്ധക്യ സഹജമായ അസുഖങ്ങളെ തുടര്ന്ന് ദീര്ഘനാളായി ചികിത്സയിലായിരുന്നു. ആര്.എസ്.പി സംസ്ഥാന സെക്രട്ടറി, അഖിലേന്ത്യാ സെക്രട്ടറി എന്നീ നിലകളില് പ്രവര്ത്തിച്ചിട്ടുണ്ട്.
1940 ഏപ്രില് 20 ന് തിരുവനന്തപുരം ജില്ലയില് ജനിച്ച ചന്ദ്രചൂഢന് ബി.എ, എം.എ പരീക്ഷകള് റാങ്കോടെ പാസായി. ആര്.എസ്.പി വിദ്യാര്ഥി സംഘടനയിലൂടെയാണ് സജീവ രാഷ്ട്രീയത്തിലെത്തിയത്. ശാസ്താംകോട്ട ദേവസ്വം ബോര്ഡ് കോളജില് അധ്യാപകനും പി.എസ്.സി അംഗവുമായിരുന്നു.
1975 ല് ആര്.എസ്.പി സംസ്ഥാന സെക്രട്ടേറിയേറ്റ് അംഗമായ ചന്ദ്രചൂഢന് 99 ല് സംസ്ഥാന സെക്രട്ടറിയായി. 2008 ലാണ് ദേശീയ ജനറല് സെക്രട്ടറിയായത്. 2018 വരെ ആ ചുമതലയില് തുടര്ന്നു. നിലവില് ആര്.എസ്.പി സംസ്ഥാന സമിതിയില് സ്ഥിരം ക്ഷണിതാവായിരുന്നു.
ആര്യനാട് മണ്ഡലത്തില് നിന്ന് നിയമസഭയിലേക്ക് മത്സരിച്ചിരുന്നെങ്കിലും വിജയിക്കാനായില്ല. ആരോഗ്യ പ്രശ്നങ്ങളെ തുടര്ന്ന് കഴിഞ്ഞ കുറെനാളുകളായി സജീവ രാഷ്ട്രീയത്തില് നിന്ന് വിട്ടുനില്ക്കുകയായിരുന്നു ചന്ദ്രചൂഢന്.