തിരുവനന്തപുരം: കത്ത് വിവാദം ചര്ച്ച ചെയ്യാന് തിരുവനന്തപുരം മേയര് ആര്യ രാജേന്ദ്രന് വിളിച്ച നഗരസഭ പ്രത്യേക കൗണ്സില് യോഗം സംഘര്ഷത്തില് കലാശിച്ചു.
പ്രതിപക്ഷ കൗണ്സിലര്മാര് നടുത്തളത്തിലിറങ്ങി പ്രതിഷേധിച്ചു. കരിങ്കൊടിയും 'മേയര് ഗോ ബാക്ക്' മുദ്രാവാക്യങ്ങളുമുയര്ത്തി മേയറുടെ രാജി ആവശ്യപ്പെട്ടാണ് പ്രതിപക്ഷം പ്രതിഷേധമുയര്ത്തിയത്. പ്രതിപക്ഷ ബഹളത്തെ തുടര്ന്ന് നഗരസഭ യോഗം അവസാനിപ്പിച്ചതായി മേയര് ആര്യ രാജേന്ദ്രന് പ്രഖ്യാപിച്ചു. ഒരു മണിക്കൂറോളം നഗരസഭ സംഘര്ഷാവസ്ഥയില് ആയിരുന്നു.
മേയര്ക്ക് പിന്തുണയുമായി ഭരണപക്ഷ കൗണ്സിലര്മാരും രംഗത്തെത്തിയതോടെയാണ് കാര്യങ്ങള് സംഘര്ഷത്തിലേക്ക് നീങ്ങിയത്. പ്രതിപക്ഷ കൗണ്സിലര്മാരെ പ്രതിരോധിച്ച് എല്ഡിഎഫ് വനിതാ കൗണ്സിലര്മാര് രംഗത്തെത്തി.
മേയറെ അധ്യക്ഷസ്ഥാനത്തിരുത്തി കത്ത് വിവാദം ചര്ച്ച ചെയ്യാനാവില്ലെന്ന നിലപാടാണ് ബിജെപിയും യുഡിഎഫും കൈക്കൊണ്ടത്. മേയറിനെ മാറ്റിനിര്ത്തി വേണം ഈ ചര്ച്ച നടത്താനെന്നറിയിച്ച് ഇരുകക്ഷികളും കത്ത് നല്കിയിരുന്നു. എന്നാല് എല്ഡിഎഫ് ഇത് അംഗീകരിക്കാതെ യോഗം വിളിക്കുകയായിരുന്നു.