തിരുവനന്തപുരം: പ്രവാസികളുടെ മക്കളുടെ ഉപരി പഠനത്തിനായുള്ള നോര്ക്ക സ്കോളര്ഷിപ്പിനുള്ള അപേക്ഷാ തിയതി നീട്ടി. സാമ്പത്തിക പിന്നാക്കാവസ്ഥയിലുള്ള പ്രവാസികളുടെയും, നാട്ടില് തിരിച്ചെത്തിയവരുടേയും മക്കളുടെ ഉപരിപഠനത്തിനായുള്ളതാണ് സ്കോളര്ഷിപ്പ്.
ഡിസംബര് 23 ആയിരുന്ന തിയതിയാണ് 2023 ജനുവരി ഏഴിലേയ്ക്ക് ദീര്ഘിപ്പിച്ചിരിക്കുന്നത്. 2022-23 അധ്യായന വര്ഷം പ്രൊഫഷണല് ബിരുദം, ബിരുദാനന്തര ബിരുദം എന്നീ കോഴ്സുകള്ക്ക് ചേര്ന്ന വിദ്യാര്ത്ഥികള്ക്കാണ് ആനുകൂല്യം ലഭിക്കുക.
കുറഞ്ഞത് രണ്ടു വര്ഷമെങ്കിലും വിദേശത്ത് ജോലി ചെയ്തിട്ടുളള ഇ.സി.ആര് ( എമിഗ്രേഷന് ചെക്ക് റിക്വയേഡ്) കാറ്റഗറിയില്പ്പെട്ടവരുടെയും, രണ്ടു വര്ഷമെങ്കിലും വിദേശത്ത് ജോലി ചെയ്ത് നാട്ടില് തിരിച്ചെത്തിയവരുടേയും (വാര്ഷികവരുമാനം രണ്ടു ലക്ഷം രൂപയില് അധികരിക്കാന് പാടില്ല) മക്കളുടെ ഉപരിപഠനത്തിനാണ് സ്കോളര്ഷിപ്പ് ലഭിക്കുക.
പഠിക്കുന്ന കോഴ്സിന്റെ യോഗ്യതാ പരീക്ഷയില് ചുരുങ്ങിയത് 60 ശതമാനത്തിലധികം മാര്ക്കുളളവരും, റഗുലര് കോഴ്സിന് പഠിക്കുന്നവര്ക്കും മാത്രമേ അപേക്ഷിക്കാന് കഴിയൂ. കേരളത്തിലെ സര്വകലാശാലകള് അംഗീകരിച്ച കോഴ്സുകള്ക്കും, അംഗീകൃത വിദ്യാഭ്യാസ സ്ഥാപനങ്ങളില് പഠിക്കുന്നവരുമാകണം അപേക്ഷകര്.