തിരുവനന്തപുരം: അടുത്ത അധ്യയന വര്ഷം മുതല് സംസ്ഥാനത്തെ പൊതുവിദ്യാലയങ്ങളില് ഗ്രേഡിങ് നടപ്പാക്കും. സ്കൂളുകള് തമ്മിലുള്ള ആരോഗ്യകരമായ മത്സരത്തിലൂടെ നിലവാരം മെച്ചപ്പെടുത്തുക എന്ന ലക്ഷ്യത്തോടെയാണ് ഗ്രേഡിംഗ് നടപ്പാക്കുന്നത്.
സ്കൂളുകളിലെ വിജയശതമാനം, കലാ കായിക രംഗങ്ങളിലെ പ്രവര്ത്തനം, അച്ചടക്കം, സാമൂഹിക വിഷയങ്ങളിലെ ഇടപെടല് തുടങ്ങി അന്പതോളം വിഷയങ്ങളിലെ പ്രകടനം വിലയിരുത്തിയാകും ഗ്രേഡിങ് നടപ്പിലാക്കുക. പൊതുവിദ്യാഭ്യാസ വകുപ്പ് മന്ത്രി വി ശിവന്കുട്ടിയാണ് ഇക്കാര്യം അറിയിച്ചത്.
അധ്യാപക സംഘടനകളോടും രാഷ്ട്രീയപാര്ട്ടികളോടും ഇത് സംബന്ധിച്ച ചര്ച്ച നടത്തിയെന്നും മന്ത്രി പറഞ്ഞു. അധ്യാപകര് തമ്മിലുള്ള തര്ക്കം ഒരു തരത്തിലും വെച്ചുപൊറുപ്പിക്കില്ലെന്നും മന്ത്രി കൂട്ടിച്ചേര്ത്തു.