വാഷിംഗ്ടൺ: അമേരിക്കൻ മാർഷൽസ് സർവീസിന് നേരെ സൈബർ (റാൻസംവെയർ) ആക്രമണം. അന്വേഷണ ലക്ഷ്യങ്ങളുമായി ബന്ധപ്പെട്ട വ്യക്തിഗത വിവരങ്ങൾ ഉൾപ്പെടെ "നിയമപാലകരുടെ രഹസ്യ വിവരങ്ങൾ" അടങ്ങിയ കമ്പ്യൂട്ടർ സംവിധാനത്തെ സൈബർ ആക്രമണം ബാധിച്ചതായി അമേരിക്കൻ മാർഷൽസ് സർവീസ് വക്താവ് വ്യക്തമാക്കി.
നിയമ പ്രക്രിയയിൽ നിന്നുള്ള വരുമാനം, അഡ്മിനിസ്ട്രേറ്റീവ് വിവരങ്ങൾ, യു‌എസ്‌എം‌എസ് (United state Marshals Service) അന്വേഷണ വിഷയങ്ങൾ, മൂന്നാം കക്ഷികൾ, ചില യു‌എസ്‌എം‌എസ് ജീവനക്കാർ എന്നിവയുമായി ബന്ധപ്പെട്ട വ്യക്തിപരമായി തിരിച്ചറിയാവുന്ന വിവരങ്ങൾ ഉൾപ്പെടെയുള്ള നിയമ നിർവ്വഹണ വിവരങ്ങൾ റാൻസംവെയർ ബാധിച്ച കംപ്യൂട്ടറിൽ അടങ്ങിയിരിക്കുന്നുവെന്ന് വക്താവ് ഡ്രൂ വേഡ് പ്രസ്താവനയിൽ പറഞ്ഞു.
അമേരിക്കയിലുടനീളമുള്ള ഫെഡറൽ തടവുകാരുടെ വിവരങ്ങളും മറ്റും കൈകാര്യം ചെയ്യുകയും ഒളിച്ചോടിയവരെക്കുറിച്ചുള്ള അന്വേഷണ വിവരങ്ങൾ പിന്തുടരുകയും ചെയ്യുകയാണ് മാർഷൽസ് സർവീസിന്റെ ദൗത്യം. ഫെബ്രുവരി 17 നാണ് മാർഷൽസ് സർവീസിന്റെ നെറ്റ്‌വർക്കിൽ നിന്ന് രേഖകൾ ചോർത്തുന്നതും മോഷ്ടിക്കുന്നതും കണ്ടെത്തിയത്.
വിഷയം കണ്ടെത്തിയ ഉടനെ സൈബർ ആക്രമണം ബാധിച്ച സിസ്റ്റം മറ്റുള്ളവയിൽ നിന്നും വിച്ഛേദിച്ചു. മാത്രമല്ല സംഭവത്തിൽ നീതിന്യായ വകുപ്പ് ഫോറൻസിക് അന്വേഷണം ആരംഭിക്കുകയും ചെയ്തുവെന്ന് വേഡ് വ്യക്തമാക്കി.
നിലവിൽ നീതിന്യായ വകുപ്പിന്റെ അന്വേഷണം പുരോഗമിക്കുകയാണ്. ഫെബ്രുവരിയിൽ അമേരിക്കൻ ഫെഡറൽ ലോ എൻഫോഴ്‌സ്‌മെന്റ് ഏജൻസികളെ ബാധിക്കുന്ന രണ്ടാമത്തെ പ്രധാന സൈബർ ആക്രമണ സംഭവമാണിത്.
ഈ മാസമാദ്യം എഫ്ബിഐയുടെ കമ്പ്യൂട്ടർ ശൃംഖലയിൽ സൈബർ ആക്രമണം ഉണ്ടായിരുന്നു. കുട്ടികളെ ലൈംഗികമായി ചൂഷണം ചെയ്യുന്ന ചിത്രങ്ങളുടെ അന്വേഷണത്തിൽ ഉപയോഗിക്കുന്ന എഫ്ബിഐ കമ്പ്യൂട്ടർ സംവിധാനത്തിലാണ് ആക്രമണം ഉണ്ടായത്.