ന്യൂഡല്ഹി: ദേവികുളം മുന് എംഎല്എ എ. രാജയെ അയോഗ്യനാക്കിയ കേരള ഹൈക്കോടതി വിധിക്ക് സുപ്രീം കോടതിയുടെ ഭാഗിക സ്റ്റേ. എ. രാജ സമര്പ്പിച്ച അപ്പീലിലാണ് സുപ്രീം കോടതിയുടെ നടപടി. ഇതോടെ രാജയ്ക്ക് നിയമസഭ നടപടികളില് പങ്കെടുക്കാം.
പക്ഷേ വോട്ട് ചെയ്യാനുള്ള അവകാശം ഉണ്ടായിരിക്കില്ല. നിയമസഭ അലവന്സും പ്രതിഫലവും വാങ്ങാനും അവകാശം ഉണ്ടായിരിക്കില്ല. കേസ് ഇനി ജൂലൈയില് പരിഗണിക്കുന്നത് വരെയാണ് വിധി സ്റ്റേ ചെയ്തിരിക്കുന്നത്.
വ്യാജരേഖ ചമച്ച വ്യക്തിയെ നിയമസഭയില് പങ്കെടുക്കാന് അനുവദിക്കരുതെന്ന് യുഡിഎഫ് സ്ഥാനാര്ത്ഥിയായിരുന്ന ഡി. കുമാറിന്റെ അഭിഭാഷകന് കോടതിയില് വാദിച്ചു. അതേസമയം സ്റ്റേ ഇല്ലെങ്കില് തെരഞ്ഞെടുപ്പ് നടക്കും എന്ന രാജയുടെ വാദം അംഗീകരിച്ചാണ് കോടതി ഇളവ് നല്കിയത്.
കഴിഞ്ഞ മാസമാണ് ദേവികുളം മണ്ഡലത്തിലെ നിയമസഭാ തെരഞ്ഞെടുപ്പ് ഹൈക്കോടതി റദ്ദാക്കിയത്. പട്ടികജാതി സംവരണ വിഭാഗത്തില്പ്പെട്ട ദേവികുളം മണ്ഡലത്തില് വ്യാജ ജാതി സര്ട്ടിഫിക്കറ്റ് ഹാജരാക്കിയാണ് മത്സരിച്ചതെന്ന യുഡിഎഫ് സ്ഥാനാര്ത്ഥി ഡി കുമാറിന്റെ ഹര്ജി അംഗീകരിച്ചാണ് രാജയെ ഹൈക്കോടതി അയോഗ്യനാക്കിയത്.