കൊച്ചി: പ്രമുഖ ഇ-കോമേഴ്സ് സൈറ്റുകളുടെ പേര് ഉപയോഗിച്ച് ഓഫറുകളുടെ പേരില്‍ സോഷ്യല്‍ മീഡിയ വഴി പരസ്യം നല്‍കുന്ന വ്യാജ ഷോപ്പിങ് സൈറ്റുകള്‍ക്കെതിരെ ജാഗ്രത പാലിക്കുക. കുറഞ്ഞ വിലയ്ക്ക് ബ്രാന്‍ഡഡ് ആയ ഇലക്ട്രോണിക്സ്, മറ്റ് ഉല്‍പന്നങ്ങള്‍ എന്നിവ നല്‍കുന്നെന്ന രീതിയില്‍ സമൂഹ മാധ്യമം വഴി പരസ്യങ്ങള്‍ നല്‍കിയാണ് ഇവര്‍ തട്ടിപ്പുകള്‍ നടത്തുന്നത്.
ഒറ്റ നോട്ടത്തില്‍ യഥാര്‍ഥ സൈറ്റ് പോലെ തോന്നിക്കുന്ന ഇവയില്‍ കയറി ഓര്‍ഡര്‍ ചെയ്ത് പണം നഷ്ടപ്പെടുന്നവരുടെ എണ്ണം കൂടുകയാണ്. ഇത്തരം വ്യാജ സൈറ്റുകള്‍ തിരിച്ചറിയുന്നതിന് അവയുടെ വെബ്സൈറ്റ് മേല്‍വിലാസം സൂക്ഷ്മമായി പരിശോധിച്ചാല്‍ മതിയാകും. ഉപയോക്താക്കള്‍ ഇത്തരം തട്ടിപ്പിനെതിരെ കൂടുതല്‍ ജാഗ്രത പുലര്‍ത്തുക.
ഈ മാസം എട്ട് മുതല്‍ പല പ്രമുഖ ഓണ്‍ലൈന്‍ വ്യാപാര സൈറ്റുകളിലും വമ്പിച്ച ഓഫറുകളില്‍ ഇലക്ട്രോണിക്സ് അടക്കമുള്ള വസ്തുക്കള്‍ ലഭ്യമായതിനാല്‍ തട്ടിപ്പില്‍ പൊതുജനങ്ങള്‍ അകപ്പെട്ട് പോകുവാന്‍ സാധ്യതയുണ്ട്. അതുകൊണ്ടാണ് ഈ വിഷയത്തില്‍ സമൂഹത്തിന് അവബോധം നല്‍കുന്നതില്‍ പൊലീസ് ശ്രമിക്കുന്നത്.