ന്യൂഡല്ഹി: ചെങ്കോട്ടയ്ക്ക് സമീപമുണ്ടായ സ്ഫോടനവുമായി ബന്ധപ്പെട്ട് അറസ്റ്റിലായ ജെയ്ഷെ-മുഹമ്മദ് ഭീകര സംഘടനയുമായി ബന്ധമുള്ള നാല് ഡോക്ടര്മാരുടെ രജിസ്ട്രേഷന് ദേശീയ മെഡിക്കല് കമ്മീഷന് (എന്എംസി) റദ്ദാക്കി.
ഡോക്ടര്മാരായ മുസാഫര് അഹമ്മദ്, അദീല് അഹമ്മദ് റാത്തര്, മുസാമില് ഷക്കീല്, ഷഹീന് സയീദ് എന്നിവരുടെ ഇന്ത്യന് മെഡിക്കല് രജിസ്റ്റര് (ഐഎംആര്), നാഷണല് മെഡിക്കല് രജിസ്റ്റര് (എന്എംആര്) എന്നിവയാണ് റദ്ദാക്കിയത്. ഉടനടി പ്രാബല്യത്തില് വരുന്ന വിധത്തിലാണ് നടപടി. ഈ ഡോക്ടര്മാര്ക്ക് ഇനി ഇന്ത്യയില് ഒരിടത്തും ചികിത്സ നടത്താനോ ഏതെങ്കിലും മെഡിക്കല് പദവി വഹിക്കാനോ കഴിയില്ലെന്ന് നോട്ടീസില് വ്യക്തമാക്കുന്നു.
ജമ്മു കാശ്മീര് പൊലീസും ജമ്മു കാശ്മീര്, ഉത്തര്പ്രദേശ് മെഡിക്കല് കൗണ്സിലുകളും ശേഖരിച്ച നിരവധി തെളിവുകളുടെ അടിസ്ഥാനത്തിലാണ് നാല് ഡോക്ടര്മാരുടെയും രജിസ്ട്രേഷന് റദ്ദാക്കിയതെന്നും ഭീകരവാദവുമായി ബന്ധപ്പെട്ട കേസില് ഡോക്ടര്മാര്ക്ക് പ്രഥമദൃഷ്ട്യാ പങ്കുണ്ടെന്ന് കണ്ടെത്തിയിട്ടുണ്ടെന്നും എന്എംസി നോട്ടീസില് വ്യക്തമാക്കുന്നു.