ന്യൂഡല്ഹി: ഡല്ഹി സ്ഫോടനത്തിന് പിന്നിലെ ഭീകര സംഘവുമായി ബന്ധമുണ്ടെന്ന് സംശയിക്കപ്പെടുന്ന രണ്ട് ഡോക്ടര്മാര് ഉള്പ്പെടെ മൂന്ന് പേര് കൂടി പിടിയിലായി. അല് ഫലാഹ് സര്വകലാശാലയിലെ രണ്ട് ഡോക്ടര്മാരെയാണ് ഡല്ഹി പൊലീസ് കസ്റ്റഡിയിലെടുത്തത്.
ചെങ്കോട്ട സ്ഫോടനത്തിന് ഉപയോഗിച്ച കാര് ഓടിച്ച ഡോ. ഉമര് നബിയുടെ സുഹൃത്തുക്കളായ മുഹമ്മദ്, മുസ്തഖീം എന്നി ഡോക്ടര്മാരാണ് ഹരിയാണയിലെ നൂഹില് പിടിയിലായത്. ഫരീദാബാദ് അല് ഫലാഹ് സര്വകലാശാലയിലെ എംബിബിഎസ് വിദ്യാര്ഥി ജാനിസുര് ആലം എന്ന നിസാര് ആലത്തെ ബംഗാളിലെ ഉത്തര ദിനാജ്പുര് ജില്ലയില് നിന്ന് എന്ഐഎ അറസ്റ്റ് ചെയ്തു. ഇതോടെ സ്ഫോടനവുമായി ബന്ധപ്പെട്ട് അറസ്റ്റിലായവരുടെ എണ്ണം 12 ആയി.
ലുധിയാനയില് താമസിക്കുന്ന നിസാര് ബംഗാളിലെ സ്വന്തം ഗ്രാമത്തില് കുടുംബത്തോടൊപ്പം വിവാഹച്ചടങ്ങിന് എത്തിയതായിരുന്നു. ഡല്ഹി സ്ഫോടനത്തില് നിസാറിന് ബന്ധമുണ്ടെന്നാണ് അധികൃതര് സംശയിക്കുന്നത്. മൊബൈല് ഫോണ് ഉള്പ്പെടെയുള്ള ഡിജിറ്റല് ഉപകരണങ്ങളും പിടിച്ചെടുത്തു.