ഫ്ളോറിഡ: ഓടിക്കൊണ്ടിരിക്കുന്ന കാറിന് മുകളില് ചെറു വിമാനത്തിന്റെ അടിയന്തര ലാന്ഡിങ്. അമേരിക്കയില് ഫ്ളോറിഡയിലെ ബ്രെവാര്ഡ് കൗണ്ടിയിലുള്ള ഇന്റര്സ്റ്റേറ്റ് 95 ല് തിങ്കളാഴ്ചയാണ് സംഭവം. ഇതിന്റെ വീഡിയോ സാമൂഹിക മാധ്യമങ്ങളില് പ്രചരിക്കുന്നുണ്ട്. അമേരിക്കന് മാധ്യമങ്ങളും വീഡിയോ പങ്ക് വെച്ചിട്ടുണ്ട്.
അടിയന്തര ലാന്ഡിങിന് ശ്രമിച്ച വിമാനം ഓടിക്കൊണ്ടിരുന്ന കാറിന് മുകളില് ഇടിച്ച് റോഡിലേക്ക് നിരങ്ങി വീഴുകയായിരുന്നു. ഒരു അടിയന്തര സാഹചര്യം ഉണ്ടായതോടെയാണ് വിമാനത്തിന് തിരക്കേറിയ ഹൈവേയിലേക്ക് അപ്രതീക്ഷിതമായി ഇറങ്ങേണ്ടി വന്നതെന്ന് ബ്രെവാര്ഡ് കൗണ്ടി ഫയര് റെസ്ക്യൂ ഉദ്യോഗസ്ഥരെ ഉദ്ധരിച്ച് മാധ്യമങ്ങള് റിപ്പോര്ട്ട് ചെയ്തു.
റോഡില് ലാന്ഡ് ചെയ്യാനുള്ള ശ്രമത്തിനിടെ അതുവഴി വന്ന ഒരു ടൊയോട്ട കാമ്പ്രയ്ക്ക് മുകളിലേക്ക് ഇടിച്ച് റോഡിലേക്ക് നിരങ്ങി വീഴുകയായിരുന്നു വിമാനം. കാര് ഓടിച്ചിരുന്ന 57 വയസുള്ള വ്യക്തിക്ക് നിസാര പരിക്കേറ്റു. ഇയാളെ ചികിത്സയ്ക്കായി സമീപത്തുള്ള ആശുപത്രിയില് പ്രവേശിപ്പിച്ചു.
വിമാനത്തില് ഉണ്ടായിരുന്ന ഇരുപത്തേഴുകാരായ പൈലറ്റും സഹയാത്രികനും പരിക്കേല്ക്കാതെ രക്ഷപ്പെട്ടതായി ഫ്ളോറിഡ ഹൈവേ പട്രോള് ഉദ്യോഗസ്ഥര് അറിയിച്ചു. വിമാനത്തിന്റെ അടിയന്തര ലാന്ഡിങിനെക്കുറിച്ചും തടര്ന്നുണ്ടായ കൂട്ടിയിടിയെക്കുറിച്ചും അന്വേഷണം ആരംഭിച്ചതായി അധികൃതര് അറിയിച്ചു.