മനാമ: പശ്ചിമേഷ്യന് സംഘര്ഷത്തെത്തുടര്ന്ന് താല്കാലികമായി അടച്ച വ്യോമപാത തുറന്ന് ബഹ്റിന്. വിമാന സര്വീസുകള് പുനരാരംഭിക്കാന് സിവില് ഏവിയേഷന് കാര്യാലയത്തിന്റെ അനുമതി ലഭിച്ചതിന് പിന്നാലെയാണ് നടപടി.
മേഖലയില് ഇറാന്റെ മിസൈല്-ഡ്രോണ് ആക്രമണങ്ങള് രൂക്ഷമായ പശ്ചാത്തലത്തില് മുന്കരുതല് നടപടിയെന്ന നിലയിലാണ് വ്യോമപാത താല്കാലികമായി അടച്ചത്. സുരക്ഷാ സാഹചര്യങ്ങള് വിലയിരുത്തിയ ശേഷമാണ് ഇപ്പോള് നിയന്ത്രണങ്ങള് നീക്കിയത്.
ഉയര്ന്ന സുരക്ഷാ മാനദണ്ഡങ്ങള് പാലിച്ച് വിമാന ഗതാഗതം സുഗമമായി നടത്തുന്നതിന് സിവില് ഏവിയേഷന് അതോറിറ്റി പ്രതിജ്ഞാബദ്ധമാണെന്ന് സിവില് ഏവിയേഷന് കാര്യാലയം വ്യക്തമാക്കി. വിമാന യാത്രക്കാരുടെയും വിമാനങ്ങളുടെയും സുരക്ഷ ഉറപ്പാക്കാനായി ബന്ധപ്പെട്ട മറ്റ് അധികാരികളുമായി ചേര്ന്ന് നിരന്തരമായ ഏകോപനം തുടര്ന്ന് വരികയാണെന്നും അറിയിച്ചു.