ന്യൂയോർക്ക്: അമേരിക്കയിലെ ന്യൂയോർക്കിലുള്ള സ്റ്റാറ്റൻ ഐലൻഡിൽ വൻ സ്ഫോടനവും അതിനെത്തുടർന്ന് വൻ തീപിടിത്തവും ഉണ്ടായി. ദുരന്തത്തിന്റെ വ്യാപ്തി കണക്കിലെടുത്ത് ഇരൂറിലധികം അടിയന്തര സേവന വിഭാഗം ഉദ്യോഗസ്ഥരെയാണ് പ്രദേശത്ത് രക്ഷാപ്രവർത്തനത്തിനായി അടിയന്തരമായി വിന്യസിച്ചിരിക്കുന്നത്.
അഗ്നിശമനസേനാ വിഭാഗം, ഇ.എം.എസ് മെഡിക്കൽ സംഘം, പൊലീസ് എന്നിവർ സംയുക്തമായി സ്ഥലത്ത് വ്യാപകമായ രക്ഷാപ്രവർത്തനങ്ങളാണ് നടത്തി വരുന്നത്. അപകടത്തിൽ പെട്ടവരെ സുരക്ഷിത സ്ഥാനങ്ങളിലേക്ക് മാറ്റുന്നതിനും തീ നിയന്ത്രണ വിധേയമാക്കുന്നതിനുമുള്ള ശ്രമങ്ങൾ യുദ്ധകാലാടിസ്ഥാനത്തിൽ പുരോഗമിക്കുകയാണ്.
അതേസമയം സ്റ്റാറ്റൻ ഐലൻഡിലുണ്ടായ ഈ സ്ഫോടനത്തിന്റെ കൃത്യമായ കാരണം എന്താണെന്ന് ഇതുവരെ വ്യക്തമായിട്ടില്ല. സംഭവത്തെക്കുറിച്ച് ഉന്നതതല അന്വേഷണം ആരംഭിച്ചതായും വരും മണിക്കൂറുകളിൽ കൂടുതൽ വിവരങ്ങൾ ലഭ്യമാകുമെന്നും ന്യൂയോർക്ക് ഔദ്യോഗിക അധികൃതർ അറിയിച്ചു.