ന്യൂഡല്ഹി: മുന്കൂട്ടി നിശ്ചയിക്കാത്ത പത്ര സമ്മേളനങ്ങള് ഒഴിവാക്കുന്ന പ്രധാനമന്ത്രി നരേന്ദ്ര മോഡിയുടെ നിലപാടിനെ ന്യായീകരിച്ച വിദേശകാര്യ മന്ത്രാലയ ഉദ്യോഗസ്ഥന് എഡിറ്റേഴ്സ് ഗില്ഡ് ഓഫ് ഇന്ത്യയുടെ ശക്തമായ മറുപടി. അധികാരത്തിലിരിക്കുന്നവരോട് ചോദ്യങ്ങള് ചോദിക്കുക എന്നത് ജനപ്രതിനിധികള് എന്ന നിലയില് മാധ്യമങ്ങളുടെ പ്രാഥമിക ചുമതലയാണെന്നും അതിനെ അവഗണിക്കുന്നത് ജനാധിപത്യ പ്രക്രിയയെത്തന്നെ ദുര്ബലപ്പെടുത്തുമെന്നും ഗില്ഡ് സംയുക്ത പ്രസ്താവനയില് വ്യക്തമാക്കി.
മാധ്യമ പ്രവര്ത്തകര്ക്കിടയിലൂടെയല്ലാതെ ജനങ്ങളുമായി നേരിട്ട് ആശയ വിനിമയം നടത്താനാണ് പ്രധാനമന്ത്രിക്ക് താല്പര്യമെന്ന് വിദേശകാര്യ മന്ത്രാലയ സെക്രട്ടറി രുദ്രേന്ദ്ര ടാണ്ഠന് അടുത്തിടെ ന്യൂസീലന്ഡില് വെച്ച് വ്യക്തമാക്കിയിരുന്നു. എന്നാല് ഈ വാദത്തെ പൂര്ണമായി തള്ളിക്കളഞ്ഞ എഡിറ്റേഴ്സ് ഗില്ഡ്, രാജ്യത്തെ ബാധിക്കുന്ന രാഷ്ട്രീയ-സാമ്പത്തിക പ്രതിസന്ധികളില് ജനങ്ങളോട് നേരിട്ട് മറുപടി പറയാന് ഭരണത്തലവന് നിയമപരമായ ബാധ്യതയുണ്ടെന്ന് ചൂണ്ടിക്കാട്ടി. പശ്ചിമേഷ്യന് യുദ്ധത്തെത്തുടര്ന്ന് രാജ്യം വലിയൊരു ഊര്ജ പ്രതിസന്ധി നേരിടുമ്പോള് പോലും മാധ്യമങ്ങളോട് സംസാരിക്കാന് പ്രധാനമന്ത്രി തയ്യാറാകാത്തത് ഇതിന് ഉദാഹരണമായി ഗില്ഡ് എടുത്ത് പറയുന്നു.
ഔദ്യോഗിക പദവിയിലിരിക്കുന്ന പ്രതിനിധികള് ഇത്തരം ബാലിശമായ ന്യായീകരണങ്ങളുമായി രംഗത്ത് വരുന്നത് മാധ്യമ സ്വാതന്ത്ര്യത്തിന്മേലുള്ള കടന്നുകയറ്റമാണ്. സമൂഹ മാധ്യമങ്ങള് വഴിയുള്ള മുന്കൂട്ടി തയ്യാറാക്കിയ ഏകപക്ഷീയമായ സന്ദേശങ്ങള് ഒരിക്കലും സ്വതന്ത്ര മാധ്യമങ്ങളുമായുള്ള സമ്പര്ക്കത്തിന് പകരമാകില്ലെന്ന് എഡിറ്റേഴ്സ് ഗില്ഡ് ഭാരവാഹികളായ സഞ്ജയ് കപൂര്, രാഘവന് ശ്രീനിവാസന്, തെരേസ റഹ്മാന് എന്നിവര് പ്രസ്താവനയിലൂടെ വ്യക്തമാക്കി. ലോകത്തെവിടെയുമുള്ള ജനാധിപത്യ നേതാക്കള് മാധ്യമങ്ങളെ അവഗണിക്കാറില്ലെന്നും വാര്ത്താ സമ്മേളനങ്ങളെ പതിവായി അഭിമുഖീകരിക്കാറുണ്ടെന്നും അവര് കൂട്ടിച്ചേര്ത്തു.