ന്യൂഡല്‍ഹി: പാര്‍ലമെന്റ് വര്‍ഷകാല സമ്മേളനം അനിശ്ചിതകാലത്തേക്ക് പിരിഞ്ഞ് ആഴ്ചകള്‍ പിന്നിട്ടിട്ടും സഭ പൂര്‍ണമായി അവസാനിപ്പിച്ചുകൊണ്ടുള്ള രാഷ്ട്രപതിയുടെ ഔദ്യോഗിക ഉത്തരവ് ഇറങ്ങാത്തത് രാഷ്ട്രീയ വൃത്തങ്ങളില്‍ വലിയ ചര്‍ച്ചയാകുന്നു. 40 ദിവസം പിന്നിട്ടിട്ടും പ്രൊറോഗേഷന്‍ വിജ്ഞാപനം പുറത്തുവരാതിരിക്കുന്നത് ഭരണ-പ്രതിപക്ഷ വ്യത്യാസമില്ലാതെ ജനപ്രതിനിധികളെപോലും ഒരുപോലെ ആശയക്കുഴപ്പത്തിലാക്കിയിട്ടുണ്ട്. സര്‍ക്കാരിന്റെ ഉന്നത തലത്തില്‍ എടുത്ത പ്രത്യേക തീരുമാനത്തിന്റെ ഭാഗമായാണ് നടപടികള്‍ വൈകുന്നതെന്നാണ് ലഭ്യമാകുന്ന വിവരങ്ങള്‍.
വിവാദപരമായ വനിതാ സംവരണ ഭേദഗതി ബില്‍ പാസാക്കിയെടുക്കാന്‍ ലക്ഷ്യമിട്ടാണ് കേന്ദ്ര സര്‍ക്കാര്‍ ഈ നീക്കം നടത്തുന്നതെന്നാണ് റിപ്പോര്‍ട്ടുകള്‍ നല്‍കുന്ന സൂചന. ഒക്ടോബര്‍ അവസാനത്തോടെ പ്രത്യേക സമ്മേളനം വിളിച്ച് ബില്‍ വീണ്ടും സഭയുടെ മുന്നിലെത്തിക്കാനാണ് നീക്കം. മുന്‍പ് ഏപ്രില്‍ മാസത്തില്‍ സഭയില്‍ വേണ്ടത്ര പിന്തുണ തികയാതെ പരാജയപ്പെട്ട ഈ ബില്‍, എങ്ങനെയും പാസാക്കിയെടുക്കാന്‍ വര്‍ഷകാല സമ്മേളനത്തിന്റെ തുടക്കം മുതല്‍ സര്‍ക്കാരിന്റെ ഭാഗത്ത് നിന്ന് നിശബ്ദ നീക്കങ്ങള്‍ നടക്കുന്നുണ്ടായിരുന്നു.
ആവശ്യമായ ഭൂരിപക്ഷം ഉറപ്പായാല്‍ ഉടന്‍ തന്നെ സമ്മേളനം പുനരാരംഭിക്കാനാണ് തീരുമാനം. ഇതിനായി എന്‍.സി.പി (ശരത് പവാര്‍), ഡി.എം.കെ തുടങ്ങിയ പ്രധാന പ്രതിപക്ഷ പാര്‍ട്ടികളുടെ പിന്തുണ ഉറപ്പാക്കാന്‍ സര്‍ക്കാര്‍ തലത്തില്‍ തീവ്ര ശ്രമങ്ങള്‍ നടക്കുന്നുണ്ട്. ഇതുകൂടാതെ ഇന്ത്യാ മുന്നണിക്ക് പുറത്തുനില്‍ക്കുന്ന പ്രമുഖ പ്രാദേശിക കക്ഷികളെയും തങ്ങളോടൊപ്പം നിര്‍ത്തി ആവശ്യമായ സംഖ്യ തികയ്ക്കാനാണ് ഭരണപക്ഷത്തിന്റെ ആലോചന.
സഭ അനിശ്ചിതകാലത്തേക്ക് പിരിഞ്ഞ് ഇത്രയും ദീര്‍ഘമായ കാലയളവിന് ശേഷവും സമ്മേളനം അവസാനിച്ചതായി വിജ്ഞാപനം വരാത്തത് പാര്‍ലമെന്ററി ചരിത്രത്തില്‍ തന്നെ പുതിയൊരു റെക്കോഡാണെന്ന് മുന്‍ ലോക്സഭാ സെക്രട്ടറി ജനറല്‍ പി.ഡി.ടി ആചാരി ചൂണ്ടിക്കാട്ടുന്നു. 2015 ല്‍ 28 ദിവസത്തിന് ശേഷം ഉത്തരവിറങ്ങിയതായിരുന്നു ഇതിനുമുമ്പ് ഏറ്റവുമധികം വൈകിയ സംഭവം. സാധാരണയായി കേന്ദ്ര മന്ത്രിസഭ നല്‍കുന്ന ശുപാര്‍ശയുടെ അടിസ്ഥാനത്തിലാണ് രാഷ്ട്രപതി പാര്‍ലമെന്റ് സമ്മേളനം വിളിച്ച് ചേര്‍ക്കുന്നതും ഔദ്യോഗികമായി അവസാനിപ്പിക്കുന്നതും.