കോഴിക്കോട്: പെയ്യുന്ന കനത്ത മഴയിലും ചോരാത്ത ആവേശത്തോടെ നാളെയുടെ കായികതാരങ്ങള്‍ ഇന്നിറങ്ങുന്നു. 68-ാമത് സംസ്ഥാന സ്‌കൂള്‍ കായികമേളയ്ക്ക് കോഴിക്കോട് ചാത്തമംഗലം എന്‍.ഐ.ടി.യിലെ അത്യാധുനിക ട്രാക്കില്‍ ഇന്ന് തുടക്കമാകും. പി.ടി ഉഷ, ഷൈനി വിത്സന്‍, അഞ്ജു ബോബി ജോര്‍ജ് മുതല്‍ ആന്‍സി സോജന്‍ വരെ നീളുന്ന കേരളത്തിന്റെ പെരുമയുള്ള കായികപാരമ്പര്യത്തിലേക്ക് പുതിയ ചരിത്രം കുറിക്കാന്‍ കൗമാര പ്രതിഭകള്‍ തയ്യാറെടുത്തു കഴിഞ്ഞു.
വൈകുന്നേരം നാലിന് മുഖ്യമന്ത്രി വി.ഡി സതീശന്‍ മേള ഉദ്ഘാടനം ചെയ്യും. ഒളിമ്പിക്‌സ് മാതൃകയില്‍ സംഘടിപ്പിക്കുന്ന മൂന്നാമത് കായികമേളയാണിത്. ഏഴ് ദിവസങ്ങളിലായി 10 വ്യത്യസ്ത വേദികളില്‍ നടക്കുന്ന കായിക മാമാങ്കത്തില്‍ 9,309 കായിക താരങ്ങളാണ് മാറ്റുരയ്ക്കുന്നത്. സേ നോ ടു ഡ്രഗ്സ് എന്ന ശക്തമായ ലഹരിവിരുദ്ധ സന്ദേശം ഉയര്‍ത്തിയാണ് ഇത്തവണത്തെ മേള അരങ്ങേറുന്നത്.
മേളയുടെ പ്രധാന ആകര്‍ഷണങ്ങളില്‍ സവിശേഷ പങ്കാളിത്തവും ഉള്‍പ്പെടുന്നു. പ്രത്യേക പരിഗണന അര്‍ഹിക്കുന്ന കുട്ടികള്‍ക്കായി ഇന്‍ക്ലൂസീവ് അത്‌ലറ്റിക്‌സ് ഇത്തവണത്തെ പ്രത്യേകതയാണ്. കൂടാതെ ഗള്‍ഫ് മേഖലയിലെ സ്‌കൂളുകളില്‍ നിന്ന് 28 കുട്ടികളും മത്സരങ്ങളില്‍ പങ്കാളികളാകും. ഇന്ത്യന്‍ ഒളിമ്പിക് അസോസിയേഷന്‍ പ്രസിഡന്റ് പി.ടി ഉഷ ദീപശിഖ തെളിയിക്കുന്ന ചടങ്ങില്‍ മന്ത്രി എന്‍. ഷംസുദ്ദീന്‍ അധ്യക്ഷത വഹിക്കും.
പ്രതിപക്ഷ നേതാവ് പിണറായി വിജയന്‍ ഉള്‍പ്പെടെയുള്ള പ്രമുഖര്‍ ചടങ്ങില്‍ പങ്കെടുക്കും. 4,000 ഓളം കായികതാരങ്ങള്‍ അണിനിരക്കുന്ന മാര്‍ച്ച് പാസ്റ്റും 3000 വിദ്യാര്‍ഥികള്‍ അവതരിപ്പിക്കുന്ന മനോഹരമായ സാംസ്‌കാരിക പരിപാടികളും ഉദ്ഘാടനച്ചടങ്ങിന് മാറ്റുകൂട്ടും. ഭക്ഷണ ക്രമീകരണങ്ങളുടെ ഭാഗമായി പഴയിടം മോഹനന്‍ നമ്പൂതിരിയുടെ നേതൃത്വത്തില്‍ ദിവസേന 25,000 പേര്‍ക്ക് വിഭവസമൃദ്ധമായ നോണ്‍-വെജ് ഭക്ഷണമാണ് തയ്യാറാക്കുന്നത്.
കഴിഞ്ഞ രണ്ട് ദിവസമായി പെയ്യുന്ന കനത്ത മഴ സംഘാടനത്തില്‍ ചില ആശങ്കകള്‍ സൃഷ്ടിച്ചിട്ടുണ്ടെങ്കിലും നിശ്ചയിച്ച സമയക്രമത്തിലോ വേദികളിലോ യാതൊരു മാറ്റവുമില്ലെന്ന് അധികൃതര്‍ വ്യക്തമാക്കി. കോഴിക്കോട് ജില്ലയില്‍ വരും ദിവസങ്ങളില്‍ റെഡ് അലര്‍ട്ട് പ്രഖ്യാപിച്ചിട്ടുണ്ടെങ്കിലും കാണികള്‍ക്കായി താല്‍കാലിക ഗാലറികള്‍ അടക്കം വിപുലമായ സൗകര്യങ്ങളാണ് എന്‍.ഐ.ടി ഗ്രൗണ്ടില്‍ ഒരുക്കിയിട്ടുള്ളത്. ആയിരത്തോളം വൊളന്റിയര്‍മാരും രണ്ടായിരത്തോളം ഒഫീഷ്യലുകളും മേളയുടെ സുഗമമായ നടത്തിപ്പിനായി രംഗത്തുണ്ട്.
ഒക്ടോബര്‍ 31 ന് വൈകുന്നേരം നാലിന് നടക്കുന്ന സമാപന സമ്മേളനം മന്ത്രി രമേശ് ചെന്നിത്തല ഉദ്ഘാടനം ചെയ്യും. അത്‌ലറ്റിക് ഫെഡറേഷന്‍ ഓഫ് ഇന്ത്യ സീനിയര്‍ വൈസ് പ്രസിഡന്റ് അഞ്ജു ബോബി ജോര്‍ജ് ചടങ്ങില്‍ മുഖ്യാതിഥിയാകും.