ടെല്‍ അവീവ്: ഇസ്രയേലില്‍ നടന്ന പൊതുതിരഞ്ഞെടുപ്പിന്റെ 90 ശതമാനത്തിലധികം വോട്ടുകള്‍ എണ്ണിത്തീരുമ്പോഴും വ്യക്തമായ ഭൂരിപക്ഷം നേടാനാകാതെ പ്രമുഖ രാഷ്ട്രീയ മുന്നണികള്‍ വലിയ പ്രതിസന്ധിയില്‍. 120 അംഗ നെസറ്റില്‍ കേവലഭൂരിപക്ഷത്തിന് 61 സീറ്റുകള്‍ വേണമെന്നിരിക്കെ, നിലവിലെ പ്രധാനമന്ത്രി ബെഞ്ചമിന്‍ നെതന്യാഹുവിന്റെ വലതുപക്ഷ-മതമൗലികവാദ സഖ്യം 53 സീറ്റുകളിലാണ് മുന്നിട്ട് നില്‍ക്കുന്നത്. മുന്‍ സൈനിക മേധാവി ഗാദി ഐസന്‍കോട്ടിന്റെ നേതൃത്വത്തിലുള്ള പ്രതിപക്ഷ സഖ്യത്തിന് 48 സീറ്റുകളാണ് ലഭിച്ചിട്ടുള്ളത്.
അതേസമയം ചരിത്രത്തിലെ ഏറ്റവും വലിയ നേട്ടത്തോടെ 19 സീറ്റുകളില്‍ വിജയിച്ച് അറബ് പാര്‍ട്ടികള്‍ ഇത്തവണ വന്‍ മുന്നേറ്റമാണ് നടത്തിയത്. സര്‍ക്കാരുണ്ടാക്കാന്‍ ഇരു മുന്നണികള്‍ക്കും ഭൂരിപക്ഷം തികയാത്ത സാഹചര്യത്തില്‍ ഭരണപക്ഷവും പ്രതിപക്ഷവും ഈ പാര്‍ട്ടികളുടെ നിലപാടിനെ ആശ്രയിക്കേണ്ട അവസ്ഥയിലാണ്.
സൈനികര്‍, തടവുകാര്‍, മെഡിക്കല്‍ ജീവനക്കാര്‍, നയതന്ത്ര പ്രതിനിധികള്‍ എന്നിവരുടെ പ്രത്യേക വോട്ടുകള്‍ അടങ്ങിയ ഡബിള്‍ എന്‍വലപ്പ് വോട്ടുകളാണ് ഇനി പ്രധാനമായും എണ്ണിത്തീരാനുള്ളത്. അന്തിമ ഫലം നവംബര്‍ നാലിന് പുറത്ത് വന്ന ശേഷം പ്രസിഡന്റ് ഐസക് ഹെര്‍സോഗ് സഖ്യരൂപീകരണ ചര്‍ച്ചകള്‍ ആരംഭിക്കും. തുടര്‍ന്ന് ഏറ്റവും കൂടുതല്‍ സാധ്യതയുള്ള നേതാവിനെ സര്‍ക്കാര്‍ രൂപവല്‍ക്കരിക്കാന്‍ ക്ഷണിക്കും.
ഭാവിയില്‍ പ്രധാനമായും മൂന്ന് സാധ്യതകളാണ് ഇസ്രയേലി രാഷ്ട്രീയത്തില്‍ തെളിയുന്നത്. പ്രതിപക്ഷവും അറബ് പാര്‍ട്ടികളും കൈകോര്‍ത്ത് നെതന്യാഹുവിനെ അധികാരത്തില്‍ നിന്ന് മാറ്റുക, കൂടുതല്‍ ചെറുപാര്‍ട്ടികളെ ഒപ്പം കൂട്ടി നെതന്യാഹു 61 സീറ്റുകള്‍ നല്‍കുക, അല്ലെങ്കില്‍ ദേശീയ ഐക്യസര്‍ക്കാര്‍ രൂപവല്‍കരിക്കുക എന്നിവയാണവ. ഈ ശ്രമങ്ങളെല്ലാം പരാജയപ്പെട്ടാല്‍ 28 ദിവസത്തെ സമയപരിധിക്കും തുടര്‍ നടപടികള്‍ക്കും ശേഷം രാജ്യം വീണ്ടും മറ്റൊരു തിരഞ്ഞെടുപ്പിലേക്ക് നീങ്ങും. പുതിയ സര്‍ക്കാര്‍ നിലവില്‍ വരുന്നത് വരെ നെതന്യാഹു തന്നെ കാവല്‍ പ്രധാനമന്ത്രിയായി തുടരുകയും ചെയ്യും.