ബെയ്ജിങ്: ചൈനീസ് കമ്യൂണിസ്റ്റ് പാര്‍ട്ടിക്കുള്ളിലെ ആഭ്യന്തര നിയന്ത്രണങ്ങള്‍ കൂടുതല്‍ കര്‍ശനമാക്കി പ്രസിഡന്റ് ഷീ ജിന്‍പിങ് തന്റെ അധികാരം പൂര്‍ണമായി ഉറപ്പിക്കുന്നു. ബെയ്ജിങില്‍ നാല് ദിവസമായി നടന്ന പാര്‍ട്ടിയുടെ നിര്‍ണായകമായ അഞ്ചാം പ്ലീനം സമാപിച്ചപ്പോള്‍, ഷീയുടെ നേതൃത്വത്തിന് ചരിത്രപരമായ പിന്തുണയാണ് ലഭിച്ചത്. അടുത്ത വര്‍ഷം നടക്കാനിരിക്കുന്ന പാര്‍ട്ടി കോണ്‍ഗ്രസില്‍ അദ്ദേഹം നാലാം തവണയും രാജ്യത്തിന്റെ പരമാധികാരത്തിലേക്ക് എത്തുമെന്ന സൂചനകളാണ് ഈ രാഷ്ട്രീയ നീക്കങ്ങള്‍ നല്‍കുന്നത്. പാര്‍ട്ടിയുടെയും സൈന്യത്തിന്റെയും ഉന്നത തലങ്ങളില്‍ അഴിച്ചുപണി നടത്തുന്നതിന്റെ ഭാഗമായി റെക്കോര്‍ഡ് ഭൂരിപക്ഷത്തില്‍ 33 മുതിര്‍ന്ന നേതാക്കളെയാണ് സമ്മേളനം പുറത്താക്കിയത്.
ചരിത്രത്തില്‍ ആദ്യമായി പ്ലീനത്തില്‍ ഇത്രയധികം ഒഴിഞ്ഞ കസേരകള്‍ കാണേണ്ടി വന്നത് വലിയ തോതിലുള്ള ശുദ്ധീകരണ പ്രക്രിയകള്‍ക്കാണ് സാക്ഷ്യം വഹിക്കുന്നത്. മുന്‍ സൈനിക മേധാവികളായ ഷാങ് യൂഷ്യ, ലിയു ഷെന്‍ലി തുടങ്ങിയ പ്രമുഖരും പുറത്താക്കപ്പെട്ടവരുടെ പട്ടികയില്‍ ഉള്‍പ്പെടുന്നു. സൈന്യത്തിലെ അഴിമതിവിരുദ്ധ നടപടികള്‍ ശക്തമാക്കിയ ജനറല്‍ ഷാങ് ഷെങ്മിനെ പാര്‍ട്ടിയുടെ ഉന്നത നിര്‍ണ്ണായക സമിതിയായ പൊളിറ്റ്ബ്യൂറോയിലേക്ക് ഉയര്‍ത്തുകയും ചെയ്തു. നിലവില്‍ ഏഴംഗ സെന്‍ട്രല്‍ മിലിട്ടറി കമ്മിഷനില്‍ ഷീ ജിന്‍പിങും ഷാങ് ഷെങ്മിനും മാത്രമാണ് ഇപ്പോള്‍ അവശേഷിക്കുന്നത്.
പൂര്‍ണമായ അച്ചടക്കം ലക്ഷ്യമിട്ട് ഇതുവരെ ലക്ഷക്കണക്കിന് ഉദ്യോഗസ്ഥരെയാണ് പാര്‍ട്ടി അച്ചടക്ക നടപടികള്‍ക്ക് വിധേയരാക്കിയിട്ടുള്ളത്. എന്നാല്‍ ഈ അഴിമതിവിരുദ്ധ നടപടികള്‍ യഥാര്‍ത്ഥത്തില്‍ രാഷ്ട്രീയ എതിരാളികളെ ഒഴിവാക്കാനും പാര്‍ട്ടിയിലെ അധികാരം പൂര്‍ണമായും സ്വന്തം കൈകളില്‍ കേന്ദ്രീകരിക്കാനുമുള്ള ബോധപൂര്‍വമായ തന്ത്രമാണെന്ന് അന്താരാഷ്ട്ര നിരീക്ഷകര്‍ വിലയിരുത്തുന്നു. അതേസമയം കനത്ത ഭയവും അച്ചടക്കവും കാരണം ഉദ്യോഗസ്ഥര്‍ പുതിയ നയപരമായ തീരുമാനങ്ങളെടുക്കാന്‍ മടിക്കുന്നത് വരും കാലങ്ങളില്‍ ചൈനീസ് ഭരണകൂടത്തിന് വലിയ വെല്ലുവിളിയായി മാറിയേക്കാമെന്നും വിദഗ്ധര്‍ മുന്നറിയിപ്പ് നല്‍കുന്നുണ്ട്.