ന്യുഡല്ഹി: ഒഎന്ജിസിയുടെ എണ്ണപ്പാടങ്ങള് സ്വകാര്യ കമ്പനികള്ക്ക് വില്ക്കാന് കേന്ദ്ര പെട്രോളിയം മന്ത്രാലയത്തിന്റെ നീക്കം. പെട്രോളിയം മന്ത്രാലയത്തിന്റെ അഡീഷണല് സെക്രട്ടറി അമര് നാഥ് ഒഎന്ജിസി ചെയര്മാന് സുഭാഷ് കുമാറിന് ഇതടക്കമുള്ള പദ്ധതി കൈമാറിയെന്നാണ് റിപ്പോര്ട്ട്.
കമ്പനിയെ സ്വകാര്യവത്ക്കരിക്കുക, വൈവിധ്യവത്ക്കരിക്കുക, വരുമാനം വര്ധിപ്പിക്കുക തുടങ്ങിയ ലക്ഷ്യത്തോടെയാണ് സര്ക്കാരിന്റെ ഇടപെടല്. 2023-24 വര്ഷമാകുമ്പോഴേക്കും കമ്പനിയുടെ ഉത്പാദനക്ഷമത മൂന്നിലൊന്ന് വര്ധിപ്പിക്കുകയാണ് സര്ക്കാരിന്റെ പദ്ധതി. പന്ന-മുക്ത, രത്ന, ആര് സീരീസ് എന്നീ ഗ്രേഡുകളിലുള്ള പടിഞ്ഞാറന് തീരത്തെ എണ്ണ പാടങ്ങളും ഗുജറാത്തിലെ ഗാന്ധാറും സ്വകാര്യ കമ്പനികള്ക്ക് വില്ക്കാനാണ് നിര്ദേശം. കമ്പനിയുടെ ഓരോ മേഖലയും പ്രത്യേകം കമ്പനികളാക്കി മാറ്റാനും നിര്ദേശമുണ്ട്. നരേന്ദ്ര മോദി സര്ക്കാര് അധികാരത്തിലെത്തിയ ശേഷം ഒഎന്ജിസിയെ സ്വകാര്യവത്ക്കരിക്കാന് നടത്തുന്ന മൂന്നാമത്തെ നീക്കമാണിത്.