ന്യൂഡല്‍ഹി: മനുഷ്യാവകാശങ്ങള്‍ സംരക്ഷിക്കണമെന്ന് ജി 7 ഉച്ചകോടി ചൈനയോട് ആവശ്യപ്പെട്ടു. ചൈനയില്‍ മനുഷ്യാവകാശ ലംഘനങ്ങള്‍ നിരന്തരം റിപ്പോര്‍ട്ട് ചെയ്യപ്പെടുന്ന പശ്ചാത്തലത്തിലാണ് ജി 7 രാഷ്ട്രങ്ങളുടെ മുന്നറിയിപ്പ്.
ഉച്ചകോടിയില്‍ പ്രസംഗിച്ച പ്രധാനമന്ത്രി നരേന്ദ്ര മോഡി ചൈനയെയും പാക്കിസ്ഥാനെയും പരോക്ഷമായി വിമര്‍ശിച്ചു. ഭീകരവാദത്തിനും ഏകാധിപത്യത്തിനും എതിരെയാണ് പ്രധാനമന്ത്രി വിമര്‍ശനം ഉന്നയിച്ചത്. തുറന്ന സമൂഹങ്ങള്‍ എന്ന പേരിലുള്ള പ്രഖ്യാപനം ജി 7 ഉച്ചകോടി അംഗീകരിച്ചു. 100 കോടി വാക്‌സിന്‍ ഡോസുകള്‍ മറ്റു രാജ്യങ്ങള്‍ക്ക് നല്‍കാനും തീരുമാനിച്ചു.
രാജ്യത്തെ കോവിഡ് വ്യാപനത്തെ ചെറുക്കാനുള്ള ജി 7 രാജ്യങ്ങളുടെ പിന്തുണക്ക് പ്രധാനമന്ത്രി നരേന്ദ്ര മോഡി നന്ദി പറഞ്ഞു. രാജ്യത്തെ എല്ലാ മേഖലകളിലും കോവിഡിനെതിരെ ഒരൊറ്റ സമൂഹമായാണ് ഇന്ത്യാക്കാര്‍ പ്രതികരിച്ചത്. അത് വളരെയേറെ ഫലം കണ്ടു. ആഗോള തലത്തില്‍ ആരോഗ്യ രംഗത്തിന്റെ മുന്നോട്ട് പോക്കിന് ഇന്ത്യ സഹായം നല്‍കുമെന്നും അദ്ദേഹം പറഞ്ഞു.