കാഠ്മണ്ഡു: നേപ്പാളില്‍ ബസ് നദിയിലേക്ക് മറിഞ്ഞ് 14 ഇന്ത്യക്കാര്‍ മരിച്ചു. നിരവധി പേര്‍ക്ക് പരിക്കേറ്റതായും റിപ്പോര്‍ട്ടുണ്ട്. തനാഹന്‍ ജില്ലയിലെ മര്‍സ്യാന്ദി നദിയിലേക്കാണ് 40 പേരുമായി യാത്ര ചെയ്യുകയായിരുന്ന ബസ് മറിഞ്ഞത്.
തലസ്ഥാനമായ കാഠ്മണ്ഡുവില്‍ നിന്ന് 110 കിലോമീറ്റര്‍ അകലെയാണ് അപകട സ്ഥലം. ഉത്തര്‍പ്രദേശ് രജിസ്‌ട്രേഷനുള്ള എം 7623 എന്ന ബസാണ് അപകടത്തില്‍പെട്ടത്. കാഠ്മണ്ഡുവില്‍ നിന്ന് പൊഖ്റയിലേക്ക് പോയ ബസായിരുന്നു ഇത്.
കഴിഞ്ഞ മാസം നേപ്പാളിലെ ചിത്ത്വാന്‍ ജില്ലയിലുണ്ടായ ഉരുള്‍പൊട്ടലില്‍ രണ്ട് ബസുകള്‍ അപകടത്തില്‍ പെട്ടിരുന്നു. ജൂലൈ 12 നുണ്ടായ അപകടത്തില്‍ ഏഴ് ഇന്ത്യക്കാരാണ് മരണപ്പെട്ടത്. അഞ്ച് പേരുടെ മൃതദേഹമാണ് ഇതുവരെ ലഭിച്ചത്.