കൊച്ചി: കീം റാങ്ക് പട്ടിക റദ്ദാക്കിയ നടപടിയില്‍ സര്‍ക്കാറിനെതിരെ ഹൈക്കോടതി ഡിവിഷന്‍ ബെഞ്ച്. പുതിയ മാര്‍ക്ക് ഏകീകരണ ഫോര്‍മുല സ്റ്റാന്‍ഡേര്‍ഡൈസേഷനും റേഷ്യോ മാറ്റവും പ്രോസ്പെക്ടസ് പരിഷ്‌കരണവും റിവ്യൂ കമ്മിറ്റി ശുപാര്‍ശ ചെയ്തിട്ടില്ലെന്നും വിദഗ്ധ സമിതിയുടെ ശുപാര്‍ശക്ക് വിരുദ്ധമാണെന്നും ഡിവിഷന്‍ ബെഞ്ച് ഉത്തരവില്‍ പറയുന്നു.
വിദഗ്ധ സമിതിയുടെ നിര്‍ദേശ പ്രകാരമാണ് മാര്‍ക്ക് ഏകീകരണ ഫോര്‍മുല തയ്യാറാക്കിയത് എന്നായിരുന്നു സംസ്ഥാന സര്‍ക്കാരിന്റെ വാദം. എന്നാല്‍ അത്തരമൊരു നിര്‍ദേശവും വിദഗ്ധ സമിതി റിപ്പോര്‍ട്ടില്‍ പരാമര്‍ശിച്ചിട്ടില്ല എന്നാണ് ഹൈക്കോടതി ഡിവിഷന്‍ ബെഞ്ചിന്റെ ഉത്തരവില്‍ വ്യക്തമാക്കുന്നത്. 5:3:2 എന്ന ഫോര്‍മുലയാണ് സര്‍ക്കാര്‍ പുതിയതായി അവലംബിച്ചത്. അതായത് കണക്കിന് അഞ്ചും ഫിസിക്‌സിന് മൂന്നും കെമിസ്ട്രിക്ക് രണ്ടും. നേരത്തെ അത് 1:1:1 എന്നായിരുന്നു. ഈ റേഷ്യോ മാറ്റം സംബന്ധിച്ച് യാതൊരു നിര്‍ദേശവും വിദഗ്ധ സമിതിയുടെ റിപ്പോര്‍ട്ടിലില്ല എന്ന് ഡിവിഷന്‍ ബെഞ്ച് ഉത്തരവില്‍ ചൂണ്ടിക്കാണിക്കുന്നു.