റായ്പൂര്: ഇന്ത്യന് ക്രിക്കറ്റ് ടീമിന്റെ പുതിയ ടി20 ജേഴ്സി പുറത്തിറക്കി. മുന് നായകന് രോഹിത് ശര്മയാണ് ജേഴ്സി പുറത്തിറക്കിയത്. ഇന്ത്യയും ദക്ഷിണാഫ്രിക്കയും തമ്മിലുള്ള രണ്ടാം ഏകദിനത്തിനിടെ നടന്ന ചടങ്ങില്വെച്ചാണ് ജേഴ്സി പുറത്തിറക്കിയത്. ചടങ്ങില് രോഹിത്തിനൊപ്പം തിലക് വര്മയും പങ്കെടുത്തു.
അടുത്ത വര്ഷം നടക്കുന്ന ടി20 ലോകകപ്പില് ഈ ജേഴ്സി ധരിച്ചായിരിക്കും ഇന്ത്യന് ടീം കളിക്കാന് ഇറങ്ങുക. ഓറഞ്ച്, നീല, വെള്ള നിറങ്ങള് ഇടകലര്ന്നതാണ് പുതിയ ജേഴ്സി. ചടങ്ങില്വച്ച് ബിസിസിഐ സെക്രട്ടറി ദേവ്ജിത് സൈക്കിയ, അഡിഡാസ് പ്രതിനിധികള് എന്നിവര് ടി20 ജേഴ്സി ഇന്ത്യന് താരങ്ങള്ക്ക് കൈമാറി.
കഴിഞ്ഞ ദിവസമാണ് ടി20 ലോകകപ്പിന്റെ ബ്രാന്ഡ് അംബാസഡറായി രോഹിത് ശര്മയെ തിരഞ്ഞെടുത്തത്. മുംബൈയില് നടന്ന ഒരു പരിപാടിയിലാണ് ഐസിസി ചെയര്മാന് ജയ് ഷാ ഇക്കാര്യം പ്രഖ്യാപിച്ചത്. ടൂര്ണമെന്റിന്റെ ഷെഡ്യൂളും ചടങ്ങില് പ്രഖ്യാപിച്ചിരുന്നു. അടുത്ത വര്ഷം ഫെബ്രുവരി ഏഴ് മുതല് മാര്ച്ച് എട്ട് വരെയാണ് ടൂര്ണമെന്റ്. ഇന്ത്യയും ശ്രീലങ്കയും സംയുക്തമായാണ് ടൂര്ണമെന്റിന് ആതിഥേയത്വം വഹിക്കുന്നത്.
2007 ല് എം.എസ് ധോനിയുടെ കീഴില് ഇന്ത്യ പ്രഥമ ടി20 ലോകകപ്പ് കിരീടം ഉയര്ത്തിയപ്പോള് ടീമില് അംഗമായിരുന്നു രോഹിത്. 2024 ല് ടി20 ലോകകപ്പ് നേടിയ ഇന്ത്യന് ടീമിന്റെ ക്യാപ്റ്റനും രോഹിത്തായിരുന്നു.